Indaihloh avangin DC leh SP atan hnamdang dah a tul tih DP&AR Minister in a sawi

DP&AR changtu Minister K. Sapdanga chuan Mizoram District hrang hrangah Mizo ngei DC leh SP dah duh thin mah ila, kan indaih miau loh avangin hnamdang dah a tul tih a sawi.

Champhai-a Govt. Gandhi Memorial High School in kum 75 an tlinna, Platinum Jubilee an lawmna pui ber nimin-a neih a hmanpuina ah DP&AR changtu Home Minister K. Sapdanga chuan he sikul atang hian mi chhuanawm tak tak leh mi hmasa - IAS, IPS, Engineer leh a dangte an lo chhuak tawh thin tih sawiin, GM High School chhuak te chu Mizoram pum titi leh hriat hlawh an ni thin tih pawh a sawi a, Vawiin-a zirlai kalkhawmte chu mi hmasate sulhnu chhui a, ram pum tana mi chhenfakawm nih tum turin a chah a. Mizoram in All India leh Central Service Regular Recruit/Direct Recruit kan nei tlem tial tial tih sawiin, kan neihchhun te pawh kan chang vek thei lo tih a sawi a. “Mizoram District hrang hrangah Mizo ngei DC leh SP dah duh thin mah ila, kan indaih miau loh avangin hnamdang dah a tul a ni,” tiin zirlaite chu helam kawnga an ngaihtuahna te seng turin a fuih bawk.

Home Minister chuan hlawhtling tur chuan mi hlawhtlingte zir anga zir mai chu a kawng awlsam tak a nih thu a sawi a. Tun atanga kum 19-ah chuan GM High School a lo zir tawh te hi Mizoram puma a thiam ber ber ni thei se a duh thu sawiin, zirlaite chu tun atanga tan la a, zirna kawngah theihtawp chhuah turin a chah bawk.

Govt. GM High School hi kum 1949-ah din niin, kumin hi an kum 75-na a ni a, nimin-a a lawmna pui ber ah hian Home Minister hian Headmaster lo ni tawh R. Khawbula (L) leh Rohmingthanga (L) te hriatrengna chawlhbuk a hawng a. He mi hnu hian Jubilee Organising Committee Chairman HT Vanlalsawma kaihhruaina in Jubilee lawmna chu School tual-ah neih zui a ni a. He hunah hian Organising Committee Secretary Vanlalzama chuan Report pein Er Hrangthanga Zote, CE PWD (Ex Student) in Souvenir a tlangzarh a, K. Lalthiangi, Senior Teacher kaihhruainain he School-a lo thawk tawh te chawimawina hun hman a ni a, Govt. GM High School-a Headmaster lo ni tawh thi tawh te sunna hun hman a ni bawk.

Champhai-a Govt. GM High School-ah hian tun dinhmunah zirlai naupang 232 awmin Zirtirtu 14 leh IV- Grade 1 an awm mek a ni.