National Badminton-ah Serchhip mi Champion

Odisha khawpui Bhubaneswar MPIS Niladri Vihar-a khelh Yonex-Sunrise 47th Junior National Badminton Championship 2024-ah Mi-zoram aiawha kal Lalrempuii d/o Albert Lalrosanga (L), Ramthlun Veng Serchhip leh a kawppui Tanoo Chandra-te chu Girl's Doubles Category-ah nimin khan an Champion a, Final-ah hian an khingpui Seeded No. 3, Durga Isha Kandrapu leh Taarini Suri-te tangdun chu 23-21, 21-15 in an hneh a ni. Lalrempuii Mizo hmeichhe zingah National Sub-Junior, Junior leh Senior Level Tournament-a Semi Final leh Final lut thei hmasa ber a ni a, Champion thei hmasa ber a ni bawk.

Serchhip Bialtu MLA leh Chief Minister Lalduhoma pawhin Lalrempuii a lawmpui thu leh a kal zelna turah duhsakna a hlan thu Social Media Account-ah tarlangin, “Badminton-ah hian India ram hi khawvel hriat khawpa sang a ni mek a. India ram pum huap Girls Category-a Champion thei naupang kan nei hi a chhinchhiahtlak hle,” a ti a. “Rempuii hi Mizo hmeichhe zingah National Sub-Junior, Junior leh Senior Level Tournament-a Semi Final leh Final lut thei hmasa ber a ni a, Champion thei hmasa ber a ni bawk. Record ropui bik a siam a ni,” a ti bawk.