Chief Minister in India Team leh Remsiami te a lawmpui

Mizo nula Lalremsiami Hmar telna India hmeichhe Hockey Team chu Women’s Asian Champions Trophy 2024-a an Champion hnuah Chief Minister Lalduhawma chuan Lalremsiami leh India Team a lawmpui thu a sawi.

Tarlan tawh angin Bihar-a khelh Women’s Asian Champions Trophy 2024-ah hian nizan hmasa khan India hian China chu si khat fai a hnehin an Champion a, India an Champion theih nan Lalremsiami hian tha a thawh hlawk hle a, Final match bikah hian 'Player of the Match' atan thlan niin Tournament chhungin goal thum a khung bawk a ni.

Chief Minister Lalduhoma chuan Women's Asian Champions 2024 Final a hnehna chang India Team te a lawmpui thu leh a bik takin Player of the Match atan Mizo nula Lalremsiami thlan a ni chu a lawmpuiin a chhuang takzet tih a sawi a. A kal zelnaah duhsakna a hlan bakah Mizo tihmingthatu lo ni chhunzawm zel turin a fuih bawk a. Sports Minister Lalnghing-lova Hmar pawhin Lalremsiami a chhuan thu leh a thlen chin atanga hmasawn zel tura a duh thu a sawi bawk.

India Team-a khel  Lalremsiami pawhin Asian Champions Trophy-a Champion theia Pathian in damna leh hriselna a pek avanga a lawm thu sawiin, “Champion ngei turin Pathian hnenah ka dil a, ka dilna te min tih hlawhtlinsak avangin ka lawm em em a, chuvangin tuna Asian Champion Trophy kan lak hi Pathian ropui nan lo ni se ka duh,” a ti a. Asia Champins Trophy hi an Team tan a pawimawh thu sawiin, “Paris Olympic-ah khan kan tling lo a, chumi hnuah kan Team hian Tournament kan khelh lehna hmasak ber a nih avangin Team pawhin kan theihtawp kan chhuah a, kan tumna leh thawhrimna te Pathian in mal min sawm,” tiin Kum tharah Pro League khel leh tur an nih thu leh chumi tur chuan theihtawpin an inbuatsaih leh bawk tih a sawi a ni.