Buara bag rihna chhuanlam ah hmang lo turin ti

Mizoram sawrkar chuan Retailer ten buk dik a buhfai an pekchhuahna ah buara bag rihna paih loh chu chhuanlam ah an hmang tawh tur a ni lo tih a tarlang.

Ration buhfai semchhuah leh buk dik chungchanga FCS&CA Department in thu-chhuah an siamah Mizoram sawrkar hnuaia Food, Civil Supplies & Consumers Affairs Department in mipuite hnena Ration buhfai buk dik pekchhuah a tumna kal zelah Retailer-te hnen atanga ngenna an dawn angin buhfai bag rihna gram 580 chu godown-ah paih (cut) thin tawh tur a nih thu tarlangin, “Retailer ten buk dika buhfai an pekchhuahna ah buara bag rihna paih loh hi chhuanlam ah an hmang tawh tur a ni,” an ti a. Retailer ten mipuite hnena buhfai an pekchhuahin buara rihna, a bukna hmanraw rihna te an chhiar tel tur a ni lo tih an tarlang.

Sawrkar chuan Retailer-te hnen atanga buara bag (jute bag) lakkhawmte chu loneitute (Sawhthing chingtute, etc) tana hman turin sawrkar in ruahmanna a siam dawn thu pawh tarlangin, Retailer ten Digital Weighing Scale (DWS) an hmang vek tur a nih thu leh an hmang lo anih chuan dan anga hmalak a ni ang tih an tarlang a. Heng bakah hian Mizoram sawrkarin Card Vara dinhmun harsa la awmte puala buhfai kg. khat zelah Rs. 20/- a an khul theihna tur Card Sen a duan chu mimal emaw, pawl ho ang emaw pawhin mahni awmna DCSO-ah ziakin dilna thehluh theih a ni tih an tarlang bawk.