Zofate Insuihkhawm leh nan hmalak zel tum

Zo Re-Unification Organisation (ZORO) buatsaiha Zofate inrawnkhawmna hunah Zofate (Chin-Kuki-Mizo) insuihkhawmleh nan hmalak zel nise tih a ni.

Inrinni khan Aizawl-a MZP Conference Hall-ah he inrawnkhawmn hi neih a ni a, he hunah hian kalkhawmte chuan resolution siamin, Chin-Kuki-Mizo chu thlahtu thuhmun, tawng khat hmang, nunphung thuhmun, Serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau an ni a, Unau an nih angin inthen thei an ni lo tih an sawi a ni. Hei bakah hian ZORO in Zofate India, Bangladesh leh Myanmar a awmte insuihlehna tura hma a lo lak tawhna leh United Nations Organisation (UNO) a dawr lehna tur reng reng chu ZORO hminga thlen thin tawh nise an ti a, Zofate India, Bangladesh leh Burma ram hrang hranga thendarha awm te insuihkhawm leh theihna turin UNO-ah Memorandum thehluh nise an ti bawk a ni.

He inrawnkhawmnaah hian, Myanmar, Bangladesh, Manipur, Tripura, Assam leh Mizoram atangin palai an kal a. Zo hnam chi peng hrang hrang 27 atangin palai an tel bakah Myanmar Zofa MP leh MLA 7 an tel bawk a ni. 

He huna thusawitu ZORO President R. Sangkawia chuan, Zoram chu Zofate ta a ni a, Zofate chenna tura Pathian pek a ni a, a neitu dik tak an ni tih a sawi a, kum tam tak intlawhpawh tawn loh avangin unau inhriat loh chang pawh a awm a, chenna a hran avangin inunauna a bo chuang lova, thisen a inzawm tlat avangin a bo chuang thei lo, tiin “Zofate thendarhtu ten India, Burma leh Bangladesh-ah te thendarh mahse la thlahtu thuhmun, nunphung thuhmun, serh leh sang inkhawihpawlh, thih leh ruam khatah ti thin unau dik tak an ni,” a ti bawk. Ani bakah hian ZORO General Secretary L. Ramdinliana Renthlei pawhin thu sawiin, ZORO Western Zone President Lalnunfela Chawngthu chuan UNO-a an kal chungchang report a pe bawk a ni.