Hmasawnna tam tak karah Radio in mipui thinlung ah ngaih pawimawh leh hlut ala hlawh tih sawi

All India Radio (AIR) Aizawl Station Director leh Mizoram Cluster Head DR. Lalropuia chuan tunlai thiamna hmanga hmasawnna tam tak awm karah Radio chu mipui thinlungah ngaih pawimawh leh hlut ala hlawh reng tih a sawi.

Akashvani Lunglei Foundation Day vawi 30-na nimin-a a hmanpui na ah Station Director chuan mipui thinlungah Radio chu hlut ala hlawh reng tih a sawi a, Akashvani thawktute chu tunlai khawvela hmasawnna hrang hrang hmang thiam a, Digital khawvela Social Media te chu hman tangkai thiam a pawimawh tih sawiin, thawktute hmasawn tuma tan lak a pawimawh tih a sawi.

Mizoram Cluster Head DR. Lalropuia chuan Akashvani Lunglei ah hmasawnna a awm zel tih sawiin, khawl tha tak tak hmanga thuam chak zel a nih thu a sawi a, hmasawnna a awm zel theih nan Technical Staff 3 dah thuai an ni dawn tih a sawi a, Akashvani Lunglei chu Mizorama FM Broadcasting Station hmasa ber a nih thu leh FM dinchhuahna anih avangin Mizorama Radio FM hlutna chawinungtu an nih thu a sawi bawk.

He hunah hian Doordarshan Kendra Director (News) Nampibou Marinmai pawhin Akashvani chuan an program hrang hrang hmangin mipui hriattur pawimawh a lo puang chhuak thin thu leh hnam ziarang pholanna pawimawh tak a ni tih sawiin, mipui rin an hlawh zel theih nan theihtawp chhuah chhunzawm turin thawktute a chah a, Radio chu mitin thleng phak anih avangin tunlai hmasawnna awm chu hmang thiam a, thawhhona tha tak nena chhunzawm zel turin a chah bawk.

Akashvani Lunglei-a Asst. Director (Program) Biakchungnunga pawhin Lunglei mipui mai bakah chhim lamah Akashvani Lunglei chuan hlut a la hlawh hle tih sawiin, Social Media lamah hmarchhak Station hrang hrang zingah mipui ngaihhlut ber a ni mek tih a sawi a ni.

Kum 1995-a din Akashvani Lunglei kum 30 tlin lawmna hunah hian Akashvani Aizawl atangin thawktu mi 20 chuang an kal bakah Field Station hrang hrang Champhai, Kolasib, Tuipang leh Saiha atangin an tel bawk a, Akashvani Lunglei-ah hian tun dinhmunah Regular staff 9 leh Casual Asignee 43 an awm mek a ni.