Mizoram-ah National Youth Festival neih leh a ni dawn

Sports & Youth Affairs Department-a Deputy Secretary Marilyn Rualzakhumthangi chuan National Youth Festival chu neih a nih leh dawn tih sawiin, tun tumah chuan Viksit Bharat Young Leaders Dialogue tih a nih dawn thu a sawi.

Nimin-a Sports & Youth Affairs Department aiawh ten Aizawl Press Club-a thuthar thehdarhtute an kawmnaah Marilyn Rualzakhumthangi chuan he thu hi sawiin, tunkar tir lam khan Union Sports Minister Dr. Mansukh Mandaviya chuan Viksit Bharat Young Leaders Dialogue chu kumthar January ni 11 leh ni 12-ah buatsaih a ni dawn tih a puan thu a sawi a. Ni hnih chhung hian Prime Minister Narendra Modi chuan thalai mi 3000 te New Delhi-a Bharat Mandapam-ah a kawm dawn thu leh hei hi India ramin ram intodelh, Viksit Bharat a nih theihna tura hmalakna pawimawh a nih thu a sawi a, Prime Minister pawhin thalai hmahruaitu nuai 1 tal India ramin a neih theihna tura hmalakna a nih thu a sawi a ni. 

Sports & Youth Affairs Deputy Secretary chuan he dialogue-a tel tur thlan dan tur sawifiahin, Round khatna chu tun thla ni 25 leh thla thar December ni 5 chhungin All India Quiz Competition buatsaih a nih dawn thu a sawi a. Heta tling te tan hian Round dang - Essay ziah intihsiak leh State huap Visksit Bharat Vision insawisiak buatsaih a nih leh tur thu leh chung Round-a tling te chu Prime Minister hoa hun hman turah an tlin dawn thu a sawi a. Mizo thalai a tam thei ang bera tel tura sawmin, Viksit Bharat thleng tura ram siam hna thawh mekah Mizo thalai a tam thei ang berin tha an thawh ve theih nan he intihsiakna hmachhawn tur leh Viksit Bharat Young Leaders Dialogue-a tel tum ngei turin thalaite a fuih a ni.