Industrial Policy duan mek a nih thu Minister in a sawi

Commerce & Industries Minister F. Rodingliana chuan Mizoram Industrial Policy duan mek a nih thu sawiin, hetah hian sawrkar danga la awm ngai lo hamthatna tam tak a awm dawn tih a sawi.

Aizawl Lammual a Branch MSME Development & Facilitation Office, Aizawl leh Commerce & Industries Department tangkawpin ni thum chhung awh tur ‘Exhibition-cum-Trade Fair’ an buatsaih hawnna hun nimin-a neih a hmanpuina ah Commerce & Industries Minister F. Rodingliana chuan kum 22 chhung Industrial Policy kan neih thu leh a ti hlawhtling turin Budget-ah sawrkarin cheng khat pawh a dah ngai lo tih a sawi a. “Kan sawrkar atangin nuai tam tak kan dah a, kumin ah pawh mi 45 in chu kan pawisa dah atangin Loan an la tawh a ni. Chu bakah in thil siamchhuah te man manzawk leh tha zawkin sawrkarin a hralh theih nan Preferential Purchase Rules te pawh kan duang a, peihfel tep tawh a ni,” a ti.

C&I Minister chuan Industry a thil pawimawh ber chu a Policy a nih thu sawiin, “Eng ang pawhin thawk mah i la, policy a that lo chuan a hlawhtlinna a awm tak tak thei lo. Tuna sawrkar chuan a ngaih pawimawh hmasak ber chu Policy hi a ni. Hun hmasa lama sawrkar te khan policy-a an lo telh loh pawimawh deuh chu Workshed hi a ni a. A in (work shed) sak nan hian sum tam tak kan seng thin si a. Tuna Mizoram Industrial Policy lo chhuak thar turah chuan telh a ni tawh a, Work shed sakna ah pawh sawrkarin a pui thei tawh dawn che u a, chu ringawt pawh chu hmasawnna duhawm tak a ni,” a ti. Minister chuan PM Vishwakarma Scheme hnuaia ni thum awh tur Exhibition-cum- Fair buatsaih theih a ni chu lawmawm a tih thu sawiin, a buatsaihtu Officials te leh participant te duhsakna hlanin, Mizoram tan rah tha a chhuah ngei a beisei thu a sawi bawk.

PM Vishwakarma Scheme in a tum ber chu thingtlang leh khawpui a kut themthiam ten an kut themthiamna hmanga eizawnna ngelnghet an neih theih nan training pek a, training zo tawh te chu honorarium Rs. 3000/- leh hmanraw leina tur Rs. 15000/- tanpuina pek te bakah dahkham awm lo Loan cheng nuai 3 thleng a lak a ni a. Basic training zo tawh te chuan cheng nuai khat loan an la thei anga, an rulh that a, advance training te an zawh leh chuan cheng nuai hnih loan an puk leh thei dawn a ni. He Loan hian pung 5% chauh a nei a ni.

PM Vishwakarma Scheme hnuaia Trade 18-a beneficiaries te chu Carpenters, Goldsmiths, Doll and Toy makers, Boat Makers, Potters, Fishing Net Makers, Bead Makers, Blacksmiths, Sculptors (stone carvers), Washermen, Masons, Cobblers/shoe artisans, Barbers, Tailors, locksmiths) (Weavers, weapon makers, hammer, Tool Kit makers and basket/mat/broom makers te an ni.