NHM hnathawh dan enfiah

Tun thla ni 19 atanga Inrinni, Nov. 23 thleng khan National Health Mission (NHM) Mizoram chuan Common Review Mission (CRM) 16-na a hmachhawn.

Common Review Mission hi Ministry of Health & Family Welfare, Govt. of India chuan kum tin India ram puma NHM hmalakna endikna, thlirletna leh hmasawnna awm te zirchiang tur a din a ni a. He zirchianna atang hian hmalakna tha leh hmasawn ngaihna te duan thin niin kumin hian India ram State hrang hrang 17 thlanchhuah zingah Mizoram pawh a tel ve a. CRM 16 na-ah hian Lunglei District leh Kolasib District te tlawhchhuakin, NHM hnuaia hmalakna te zir chian a ni a. Mizoram endiktur hian MoHFW atangin mithiam 13 an lo kal a, Team hnih ah in thenin Kolasib District leh Lunglei District chhunga Health Facility hrang hrangte tlawhin, thawktute leh mipui te a kawm a ni.

Inrinni khan Common Review Mission (CRM) kharna programme hi DHME Auditorium, MINECO-ah hman a ni a, NHM Mission Director Dr. Eric Zomawia'n kaihruaiin Health Secretary Sangchhin Chinzah chuan he hun hi a hmanpui bawk a. Health Department-a Official hrang hrangte leh National Health Programme a thawktu hrang hrangte hmaah CRM Team hian powerpoint presentation hmangin an thil hmuh hrang hrang- NHM in a tih that te leh hmasawn ngaihna laite sawiin, sawihona neih a ni bawk.