VC Term pawh tawi thu Mizoram VC ten sawiho tum

Mizoram sawrkarin an term ralhmaa Village Council te inthlang tura a tih vangin VC te an lungawi lo hle a, a tul chuan dan hre mite rawnin High Court thleng an kal mai thei.

Zalen in Mizoram Village Council Association President K. Lalngaizuala a biakna ah naktuk, Nov. 26, 2024 khian All Mizoram Village Council Association khawmpui chu Durpui Multipurpose Centre-a neih tur a ni a, he hunah hian VC thiah chungchang hi an thu ngaihtuah tur zingah a tel tih a sawi a, “Hmun hrang hranga Village Council te hian term ral hmaa inthlan tir tum kan nih avangin an thinrim hle a, ka chai nasa khawpin ka ring a ni,” a ti.

K. Lalngaizuala chuan a hun hmaa Village Council thiah chu thil kalphung a ni lo tih sawiin, “A hun hmaa Village Council inthlan tir hi tu sawrkar mahin a tih kan la hre lo a. Democracy ram kan nih angin kan inthlang thin a, hetia a hun hmaa inthlan tir hi democracy palzutnaah kan ngai a. Chumai bakah VC zahawmna tih bawrhbanna a ni a, term pawh tawi chhan an sawi hi a nep kan ti hle a ni,” a ti bawk. VC term pawh tawi chu an do hrim hrim ni lovin a democratic lo hlea an hriat vanga duh lo an ni tih a sawi bawk.

Tuna Village Council zinglai hi August ni 27,2020 a inthlang niin sawrkar chuan September ni 7,2020 hmaa chage inhlan fel vek turin a ti a ni.