Zirlai ten Vote thlak a pawimawh zia an insawi siak
Serchhip District Election Office in Systematic Voters Education & Electoral Participation (SVEEP) hnuaiah ‘Inter-School Public Speaking Competition’ an buatsaih hi Serchhip Election Officer F. Lalnisai chuan kaihraiin he hun an buatsaih chhan te a sawi a. He hun hmanpuitu District Election Officer leh Bawrhsap Paul L. Khuma chuan mi hnena thu dik dik tak mawihnai taka kan sawi chuan midangte rilru kan hnehin a hmaa an duh miah loh te pawh duh phahin an rilru thlak kan thlak sak theih thu a sawi a. Chutihrual chiah chuan kan thusawi hmang bawkin midangte rilru pawh kan hliam thei tih sawiin, thusawi thiam a pawimawh thu a sawi a. Chutihrual chuan tumah thusawi thiam sa an awm lo tih sawiin, inzir theih a nih thu leh hetiang hun remchang buatsaih a ni chu lawmawm a tih thu a sawi a, zirlaite chu an hmalam hunah hetiang hun remchang an nei a nih chuan hman tangkai zel tum turin a chah bawk.
‘Inter-School Public Speaking Competition’ ah Serchhip Town chhunga Higher Secondary School pali leh High School 8 atangin zirlai pakhat theuh telin ‘Electoral Roll a chuan leh Vote thlak pawimawhna’ tih thupui hmangin mipui hmaa thusawi intihsiakna an nei a. He in-tihsiakna ah hian C. Lalpekhlua (Govt. PCR High School Serchhip) chu pakhatna niin lawmman ah Rs. 8000/- leh thuziak a dawng a. Lalremhlua (Eklavya Model Residential School Serchhip, Higher Secondary School Section) chu pahnihna niin Rs. 5000/- leh Certificate a dawng a, Lalruattluanga (Govt. Higher Secondary School Serchhip) chu pathumna niin Rs. 3000/- leh Certificate a dawng bawk a, intihsiakna a tel te hi thuziak hlan theuh an ni bawk.
Nimin-a he intihsiakna neih hi zirlaite leh Zirtirtu ten a hmunah an chhim bawk a ni.
Comments
Post a Comment