Aizawl khawpui boruak a thianghlim tih an sawi

Mizoram khawpui Aizawl chu niminpiah khan Boruak Thianghlim tehna, Air Quality Index-ah AQI 26 a ni tih Central Pollution Control Board (CPCB) chuan tarlangin, India ram khawpui hrang hrangah boruak thianghlim ber a ni. AQI hi Index inthlak danglam reng a ni a, ruahtui tla vang pawhin boruak hi inthlak danglam thei reng a ni a. Aizawl boruak quality hi a ram leilung hian a nghawng nasain, tlangram a nih avangin hmun hrang hrangah boruak a danglam nasa hle thin a ni. Mizoram Pollution Control Board-a thawk mithiamte sawi danin, lo hal hun laiin Aizawl boruak hi a chhe thin hle a, khawlum ah boruak bawlhhlawh zual thin bawkin boruak chhia insiamte hi lirthei atanga lo chhuak an ni ber tih an sawi a, kawngpui khu bakah insakna boruak khu avangte pawhin boruak a bawlhhlawh thin a ni. CPCB tarlan dan chuan Aizawl dawtah hian Shillong leh Assam-a Nagaon te awmin AQI 37 ve ve a ni.