Solar Cold Storage Facility pahnih hawng

Rural Development Department changtu Minister Prof. Lalnilawma chuan nimin khan East Lungdar-a Shyama Prasad Mukherji Rurban Mission (SPMRM) atanga sak Solar Cold Storage Facility chu hawngin Leng khua-a Solar Cold Storage Facility pawh a hawng nghal bawk.
Heng Solar Cold Storage Facility hawnna hunah hian RD Minister chuan kuthnathawktute thlai thar vawnthatna tur Cold Storage hawn a ni ta chu lawmawm a tih thu sawiin, loneituten tangkai taka an hman a duhsak thu leh ei leh bar intodelhna kawnga hmanraw tangkai a nih ngei a beisei thu a sawi a. “Chief Minister Pu Lalduhoma kaihhruai Mizoram Sawrkar chuan kuthnathawktute tan theihtawp a chhuah mek a, a chhuah chhunzawm zel dawn a ni,” a ti bawk.

Horticulture leh PHE Department changtu Minister ni bawk Prof. Lalnilawma hian East Lungdar, Leng khua leh a chhehvela Rural Development Department leh Horticulture Department hmunhma leh hmalakna te bakah PHE hmunhma te tlawhin East Lungdar leh North Vanlaiphai khaw tana Tui pump tura hnathawh mekna, Tuipui leh Varva lui (Rawleihlawn chhuah) a tlawh bawk a. A thawktu Contractor te pawh koin, an hna tha taka tawk turin a hrilh a. Vantlang mipuite tan tui mamawhna a san tawh em avangin hna chak taka thawk turin a hrilh a. East Lungdar leh Leng khuaah hian mipuiin an duh leh an mamawhte an thlen theihna hun siam sakin Public Interview hun a hawng a, mipui ten an hlut hle bawk a ni.

Minister hi Serchhip DRDO Project Director Malsawmtluanga Fanchun leh East Lungdar BDO Peter Malsawmtluanga bakah Department hotu ten an tawiawm bawk a ni.