Apex Bank in Bank titha ber lawmman an dawng

Mizoram Cooperative Apex Bank (MCAB) Ltd. chuan State Co-operative Bank zinga titha ber 'Annual Performance Award For Best Performing State Cooperative Bank II-Tier Structure 2023-2024' dawngin he lawmman hi Union Home & Cooperation Minister Amit Shah hnen atangin an dawng a ni.

Mizoram Cooperative Apex Bank Ltd. hian tehfung hrang hrang hmanga endiknaah a zawna kum hnihna (2022-23 & 2023-24) atan India ram puma II-Tier Structure State Co-operative Bank zinga titha ber 'Annual Performance Award For Best Performing State Cooperative Bank II-Tier Structure 2023-2024' lawmman hi National Federation of State Co-operative Banks (NAFSCOB) Diamond Jubilee lawmna New Delhi Bharat Mandapam, Pragati Maidan-a neih mekah an dawng a, he lawmman hi Mizoram Cooperative Apex Bank-a Chief Executive Officer A. Lallungmuana leh MCAB Chairman Lalnunsanga te chuan Union Home & Cooperation Minister Amit Shah-a hnen atangin an dawng a ni.

Apex Bank hotute chuan lawmman hlu tak, Best Performing State Cooperative Bank Award kum 2 chhung a zawna dawng theia an awm chu Mizoram mipui, Sawrkar leh Share Holder-te tawiawmna vang a nih thu sawiin, lawmmthu an sawi a. Apex Bank tarlan danin Mizoram a Bank 23 awm mekte zinga Mizo mipuite tana luangchhuak nasa ber an ni a, CD Ratio 77% an nei mek a ni.