Mizoram kaltlang-a Churachandpur-a buhfai phurhluh chu tluang taka kalpui zel a ni

Manipur State chhung buaina avanga Churachandpur leh a chhehvela Food Corporation of India (FCI) Aizawl Divisional Office in buhfai a thawn thin chu tluang taka la kalpui zel a ni.

FCI Aizawl Divisional Manager Zodinpuii Ralte chuan Churachandpur-a buhfai an thawn tan nikum June thla atanga tun November thla thlengin buhfai quital 1,79,565 chuang hret a nih thu sawiin, Sawrkar laipui atanga titawp tura an rawn tih lemloh chuan pek chhuzawm zel a ni dawn tih a sawi a. Churachandpur-a buhfai an pek thinah Mizoram sawrkar pawhin theihtawp an chhuah pui tih sawiin, Bairabi-a Rel a lo thlen apiangin Truck 20 atanga 30 vel bawrin an thiar chho ziah tih a sawi a, Rel-a wagon an dawn zat milin ruahmanna mumal tak hnuaiah pekchhoh thin a nih thu sawiin, Fur laia kawng a chhiat nasat lai pawha tlawmngai taka buhfai phur thintu Truck khalhtute leh neitute chungah an lawm hle tih a sawi bawk.

Churachandpur-ah hian an State chhunga buaina a chhuah avangin sawrkar laipui chuan Food Corporation of India, Aizawl Divisional Office hnenah buhfai thawn thin turin a hriattir a. Nikum June thla khan buhfai quintal 8566 chuang hret thawnin bul an tan a, an thawn hnuhnun ber tun thla bikah quintal 10,541 chuang hret an thawn thung a ni.

FCI Aizawl Divisional Manager chuan Churachandpur hian Manipur State khawpui Imphal lam atangin buhfai an dawn theih loh thu a sawi a. Jiribam, Assam lamah Rel thleng ve tho thin mahse Imphal paltlang a ngaih avangin helam kawng atang hian buhfai phurhluh theih a nih loh thu a sawi bawk a ni.