Mizoram-a lung In ah tang tur zat aiin tang an tam

Mizoram chhunga tan In hrang hrang ah lung In-a tang thei bithliah zat aia tam tang 514 an awm mek.

Prisons Department in Akashvani Correspondent zawhna a chhan danin, tun dinhmuna State chhunga lung In tang zawng zawng zat chu 1715 an ni a, mi tangte hi Aizawl Central Jail-ah tam berin mi 812 an tang mek a, Champhai District Jail-in dawt lehin mi tang 161 an awm mek a ni. Mizoram chhunga lung In-a mi tang tlem berna chu Lawngtlai District Jail niin mi tang 35 an awm mek a, Naupang kumtling lo, an nu leh pa te lung In tan avanga tan In-a enkawl Aizawl Central Women Jail-ah 4 leh Champhai District Jail-ah pakhat, a vai a belhkhawmin 5 an awm mek bawk a ni.

Mizoram-a lung In hrang hranga tang tur zat aia tam an tanna zingah Aizawl-a Central Jail-ah mi tang an tam ber a, tang tur zat bithliah aia tang an tamna hi 374 a ni a, Champhai District Jail chuan dawt lehin mi tang thei zat aiin tang mi 56 in an tam zawk a, mi tang awm tura tih ai a tam hi Aizawl Central Women Jail-ah pawh tangin an tamna hi 46 a ni a, Aziawl District Jail-ah 25 leh Lawngtlai District Jail-ah 13, an vaiin 514 an awm mek bawk a ni. Mizoram chhung lung In zawng zawnga mi tang awm thei tura bithliah hi mipa 1130 leh hmeichhia 256, an vai a belhkhawmin 1386 a ni.