Home Minister in Jail-a thawktute a chah

Home Minister K. Sapdanga chuan Jail chu mihring nun siamthatna hmun tak taka chhuah turin taima taka an enkawlte vil turin Jail-a thawktute a chah.

Inrinni kalta-a Champhai District Jail a tlawhna ah Home Minister K. Sapdanga chuan kan State chhunga Jail hrang hrangah Jail chhunga awm tur zat aia tam kan awm deuh vek tih sawiin, “Mihring kan pung chho zel a, sualnate pawh a pung ve zel bawk a, Jail-a lut kan tam telh telh bawk a, kan ram mihring cheng zat nena khaikhin chuan Jail tang kan thahnem hle a, hei hi thil pawi tak a ni,” a ti a. “Kan Police te leh tlawmngai pawl ten theihtawp an chhuah zel anga, hmasawnna hmuh zel kan inbeisei a ni,” tiin mi thenkhat ten Jail atang hian a tha zawnga thil zir chhuah an neih laiin thenkhat erawh chuan an Jail tan pui te hnen atangin thil tha lo thiam belhte an nei thin tih a sawi a. Jail-a hnathawktute pawhin tan an lak thar a tul hle tih sawiin, “Mihring nun siamthatna hmun tak taka chhuah turin taima takin kan enkawlte i vil ang u. Mi thahnemngai, pawn lam atanga Pathian thuhriltute, sawrkar Department dang dang ten Jail tang te hnena thiamthil an zirtir thinte hi a hlut zia hriain Jail tang te pawhin lo chhawr tangkai zel se ka duh a ni,” a ti bawk.

Home Minister hian Zokhawthar Police Station leh Land & Custom building te pawh tlawhin ruihhlo laka fihlim lo Police awm te hian nghawng a neih thui zia kan hriat a tul thu a sawi a, “Kan enkawl ram tan tan la thar theuh turin kan Police te pawh ka sawm a ni,” a ti.

Home Minister hian Champhai District Jail a tlawhnaah SASCI Part IV atangin District Jail sak that a nih tur thu a sawi a, Champhai District Jail hi mi 105 awm theihna a nih laiin tun dinhmunah mi 165, mipa 115 leh hmeichhia 14 an tang mek a. Thawktu 20 an awm mek bawk a. Hringlang Tlang Society te sawmna angin Hringlang Tlang-ah hun a hmang bawk a ni.