Sihhmui-a Rel kawng chhia siam lohin chawlhsan rei

Mizoram Rajya Sabha MP K. Vanlalvena chuan Sihhmui-a Rel kawng siam meka Lei chim chu kum khat lai thawk chhunzawm lo-a chawlhsan a nih thu a sawi.

Niminpiah khan Parliament Annexie building Committee Room-ah Parliamentary Committee on Railways meeting neih niin he hunah hian India ram puma Railways Bridge (lei dawh), tunnel (lei verh), Railway Lei motor kawngpui in a tantlang chungchangte thlirho a ni a. Rajya Sabha MP K. Vanlalvena chuan Sihhmui-a Railway Bridge siam lai chu nikum-ah a chim thu te, chumi avanga kum khat lai hna thawh chhunzawm lova chawlhsan a nih thu te, kumina zawh tura ruahman chu thawh zawh hman a nih tak loh thu te, tun anga an thawh muan reng chuan nakum 2025-ah pawh zawh a nih dawn loh thute sawiin; chak zawka hna thawh a nih theih nana hmalak a tul thu a sawi bawk a ni.

He meeting hi Parliamentary Committee on Railways Chairman CM Ramesh chuan kaihruaiin North East Frontier Railway tawpna hmun ni tur Sihhmui Rail Station siam mek chu nakum 2025-ah zofel tura ruahman a ni a, he hna kallai mek a hmuna endik tur hian Rajya Sabha MP K. Vanlalvena ngenna bawhzuiin Parliamentary Study Team te Mizoram-ah rawn kal tura ruahmanna siam a ni.

Tun dinhmunah India ram pumah Railway Lei (bridge)163,810 a awm mek a. Chung zinga Lei 11,918 te chu kum 2014 atanga 2024, kum sawm chhunga dawh thar te niin a siam nan cheng vbc. 8208 hmanral a ni a. Leiverh hmun 540-ah awmin a thui zawng belhkhawm chu KM 199.96 a ni bawk a. Rail kawng leh motor kawng in tantlangna hmun 17,998-ah awm mek in heng Railway leh Highway intantlangna hmun zawng zawngah hian Lei dawh vek tura rua-hmanna siam a ni bawk.