MSPMC in Sihphir kawng siam mek an enfiah

Mizoram State Project Monitoring Committee (MSPMC) chuan Durtlang Leitan atanga Sihphir kawng siam mek chu Zirtawpni khan Vice Chairman R. Lalrinawma hova enfiahin tha taka zawhfel thuai a nih theih nan Sawrkar, Contractor leh khawtlang hruaitute thukhat vuaa tan ho a tul thu an sawi.

He kawng hi KM 10.250-a thui tur niin, Sawrkar laipui Ministry of Road Transport & Highway (MoRTH) hnuaia Central Road & Infrastructure Fund (CRIF) Scheme atangin cheng vbc. 46.57 hmuh a ni a. EPC Mode a thawkin, Contractor chu SLT Infracon Pvt. Ltd., Hailakandi, Assam niin, agreement amount chu cheng vbc. 35.53 a ni.

He hna in a huamtel zingah hian a tul dan leh remchanna laia kawngchhuat zauh hna kalpui, kawngchhuat tihmuk that, Alkatra luan hlui haikhawh, kawngpui phah nghahchhan atan Dry Lean Concrete 150 mm (6 inch), 6.00 m a zau phah thar, kawngpui phah thar/Concrete Pavement, Concrete M40 Grade, 250 mm (10 inch) a chhah siam, Culvert awmsa zawm sei, Hume Pipe Culvert leh Retaining Wall siam te a tel a. He kawngpui siamna atan hian Concrete Grade sang tak hman niin a siamna hmanrua pawh a tha thawkhat viau a. Khawl hmangin hna hi thawh niin he hna hi January 2025-a zofel hman tura ruahman ni mah se, hna hi a khaihlak thin avangin a zawh hun tur aia rei an hman a rinawm a, November 2024 thlenga hnathawh tawh chin hi 33% vel a ni. MSPMC te chuan he hna thawk tura Contractor inbuatsaihnate chu a tha thawkhatin an hria a. Tha taka zawhfel thuai a nih theih nan Sawrkar, Contractor leh khawtlang hruaitute thukhat vuaa tan ho a tul thu an tarlang bawk.