CM in North East Mini Jamboree a hawng

Bharat Scouts & Guides North East Mini Jamboree vawi 8-na chu State Training Center, Tanhril-ah neih niin Inrinni khan Chief Minister Lalduhoma chuan a hawng.

Mizoram Bharat Scouts & Guides President ni bawk Lalduhoma chuan State hrang hrang atanga Mini Jamboree hmang tura lo kal te chu an lo lawm tih sawiin, Mizoram-ah hun nuam tak an hman ngei a beisei tih a sawi a. “Kan awmna ram bial te, kan tawng te leh kan nunphung te chu danglam mah se inrem takin kan chengho thei a, ram tan kan thawkho thei. Chu chu kan chakna hnar a ni,” tiin tangruala hma kan laknaah chuan kan hlawhtling thin tih a sawi a. Bharat Scouts & Guides in a thiltum ber pawh tangruala India tha zawk din a ni tih sawiin, “He Jamboree neih chhung hian thil hrang hrang in ti ho dawn a. Scouts & Guides dintu Lord Baden Powell chuan, ‘Hlimna dik tak neih dan chu, midangte hlimna siamsak hi a ni’ a lo tih ang khan, he hun tawiteah hian in thian thar te hlimna thlentu lo ni theuh ang che u,” tiin a chah a ni.

Tun tum hi Mizoram in North East Mini Jamboree a thlen vawi hnihna niin he hun hi India hmarchhak bik tana ruahman a ni nain State dang atanga rawn kal pawh engemawzat awmin an vaiin mi 300 vel an tel a, tun thla ni 28 thleng neih tura ruahman niin hemi chhung hian thil chi hrang hrang zir-a tih ho a ni dawn a ni.

He hunah hian Chief National Commissioner, Dr. KK Khandelwal IAS (rtd) chuan Chief Minister in Mizoram Bharat Scouts & Guides te phur taka hma a lo lakpui thin dan an hriat thu sawiin, “Bharat Scouts & Guides tana a thawhhlawk avang hian National Award sang ber Silver Elephant Award dawng turin kan thlang a ni,” tiin Lalduhoma hnena Silver Elephant Award hlan a nih tur thu a puang a. He Award dawng tura an rawtna DO Letter hi Chief Minister a hlan nghal a. He Award hi President of India in a hlan thin niin hun remchang hmasa berah Chief Minister hi hlan an tum ang.