Naupangte harsatna tawh ah Consultation Meeting nei

Mizoram State Commission for Protection of Child Rights (MSCPCR) leh Social Welfare, Tribal Affairs & Women and Child Development (SW, TA & WCD) Department te, School Education Department leh Samagra Shiksha Mizoram hotute chuan nimin khan Aizawl-ah Consultation Meeting an nei.

Kumin October 10-a Social Welfare Minister Lalrinpuii hova thukhawm in thu pawimawh hrang hrang an rel bawhzuia he Consultation Meeting neih ah hian naupang enkawlna hmun, Special Home-a naupangten bahlah lova zirna an chhunzawm theihna tura Zirna In/School tih changtlun dan te ngaihtuah a ni a; Children’s Home-a naupang awm ten kum 18 an tlin hnu a letna leh hawna tur tha leh belhchiandawl chhungkua leh mahnia inenkawl thei tur leh mahni ke a ding thei tura thiamna mumal nei lo te tana enkawl zuina (After Care Programme) tihhmasawn theih dan turte sawiho niin After Care Programme atana fund-te a beitham em avanga tuna programme kalpuilai pawh duh ang a tihhmasawn a harsat zia te tarlan a ni.

MSCPCR chuan tunhnaiah Aizawl leh Champhai District chhunga naupang enkawlna hmun Child Care Institutions (CCIs) te a tlawhchhuak mek a, hemi atang hian Children’s Home hrang hranga Fund indaihlohna te, a thawktu te indaihlohna te leh harsatna hrang hrang an tawh te a taka hmuhpuiin, an harsatna te sutkian a nih theihna turin sawihona neih a ni bawk a. School Education Department enkawlna hnuaia hmalakna te sawiho ni bawkin, School Bag rit lutuk chu zirlai te tan phurrit leh hriselna lam thlenga nghawng tha lo nei thei a nih avangin School Bag rih zawng tihniam thei tura hmalak dan turte ngaihtuahho a ni a, heng bakah zirlai kaihhnawih inenkawlna hrang hrangte naupang tana hmasawnna tur leh phurrit awm lo tura kalpui leh ruahmanna siam a tul zia te sawiho a ni.