Mizoram State Board for Wildlife thutkhawm nei

Mizoram State Board for Wildlife thutkhawm vawi 11-na chu nimin khan Chief Minister Lalduhoma hovin CM Conference Hall-ah neih a ni.

He thutkhawm ah hian EF&CC Minister Lalthansanga leh Adviser to Chief Minister TBC. Lalvenchhunga te bakah T. Lalhlimpuia MLA leh Member dangte an tel a, Pukzing to Silsury kawngpui zauhna tur atana wildlife clearance pek rawtna chu remti in National Board for Wildlife-ah recommend a ni anga. Ramsaten mihring ranvulh an tihhlum palha zangnadawmna pek tur sum, AH & Vety Department-in an bithliah chu pawm bawkin, a taka kalpui theih tura lo bawhzui turin AH & Vety Department chu mawhphurhna pek a ni bawk.

Heng bakah hian Mizoram-a a hmasa ber atan Kawnpui khaw hlui tlang, Kawnpui khawtlangin kum tam tak an lo humhalh tawh, Zotlang Ngaw chu section 36 (c) of Wildlife (Protection) Act, 1972 dan anga Community Reserve a puan remtih niin helai ram hi ram Hectare 620 a zau a ni a. Thorangtlang Wildlife Sanctuary huamchhunga awm Dampui khua sawnchhuah (relocation) kal zelah zangnadawmna la dawng ve lo chhungkaw paruk (6) te hnenah a rang lama zangnadawmna pek nise an ti bawk.