Lawngtlai-ah kawngpui siam tur sawihona neih a ni

Lawngtlai District chhung Bungtlang - Ngeng-puitlang - Tuithumhnar kawng laih tur chungchang sawihona chu niminpiah khan District Bawrhsap Cheemala Siva Gooal Reddy IAS hovin DC Conference Hall-ah neih a ni a, he hunah hian Lawngtlai DC chuan inkalpawhna kawngpui tha zawk siam a nih chuan a chhawrtu tur ber chu he kawngin a paltlang khuate an ni tih a sawia. Kawngpui laih turah harsatna siam awm lo a a hma lama hna thawh tan chu thil pawimawh tak a nih thu a sawi a. He kawngin a paltlang khuaa Village Council (VC) leh NGO-te chu thil tha an neih turah thahnem ngai taka sawrkar leh kawng siamtute thawhpui thiam turin a chah a. Hnathawh tan a nih hunah pawh uluk taka lo enpui tur leh kawngpui tha tak siam a nih theih nana theihtawp lo chhuah turin a sawm nghal bawk a ni.

Bungtlang - Ngengpuitlang- Tuithumhnar kawng hi tun dinhmunah KM 48-a thui niin Defence Road hi a kal chuan KM 16 chauh a ni dawn a, a hma aiin KM 32 zetin a tawi dawn a. Bawrhsap hova thutkhawmah hian Kawngpui in a paltlang tur khua ten 'Social Impact Assessment' neih kher ngai an tih leh tih loh sawiho a ni a. Village Council leh NGO te chuan kawngpui tha tak an neih turah lawmawm an tih thu he hunah hian tarlangin, Social Impact Assessment nei kher lo a, kawngpui siam hna tan chu tha ber ah ngaiin lungrual takin an pawm tlang a ni.