Oil Depot chungchanga IOC hmalakna CM in a sawipui

Chief Minister Lalduhoma chuan nimin khan Indian Oil Corporation hotute kawmin Mizoram a Oil Depot din tura hmalakna chungchang a sawipui.

Chief Minister Pisa-a an inkawmna ah hian Chief Minister Lalduhoma chuan Oil Depot neih thuai kan duh thu sawiin, “A hmun thlan tur pahnih kan chhawp che u hi tlang fel rang ula, hnathawh theih hun (working season) a intan tawh avangin hna tan thuai ula kan duh a ni,” tiin Oil Depot atana an thlenchin te a sawipui a ni.

He hunah hian Indian Oil Corporation-a Executive Director & Sales Head, Indian Oil AOD, State Office Rajesh Nambiar chuan Document an neih zawng an Headquarters lamah an thehlut tawh tih sawiin, zawhna tlema zawng an rawn zawh leh mek thu leh reilote ah an thlan fel mai a rin tawh thu a sawi a. “Kan thlan fel chuan kum hnih chhunga kan sak zawh mai theih ka beisei,” a ti. Oil Depot lama an hmalakna bakah Mualkhang Bottling Plant tharthawh tura an hmalakna hrang hrang te, Electrict Vehicle a lo pun zel avanga Charging Station engemawzat siam tura hma an lak mek thu te, Indian Oil Corporation in CSR hmanga Mizorama hna an thawh te pawh Chief Minister hnenah hian an hrilh a. CSR hmalakna ah hian hmachhawp an neih nual thu a sawi bawk.

IOC hian Mizoram-ah Petrol Pump 72 an nei mek a, Electric Charging Station 20 siam tumin hma an la mek bawk a. Mualkhang Bottling Station Site development an thawk tan tawh a, tunah hian a hungna tur Tender an tichhuak mek a. Local Contractor ten an hna hi ngaihven ve se an duh thu pawh an tarlang a ni.