Serchhip-ah Central CIC lo kal

Central Chief Information Commissioner (CIC) Heeralal Samariya chuan niminpiah khan Serchhip rawn tlawhin Serchhip District chhunga SPIO leh SAPIO zawng zawngte nen inkawmna hun an hmang.
Serchhip DC Pisapui Hall-ah inkawmna ah hian Serchhip District chhunga RTI kalpui dan thlirletna neiin Danin a phut anga RTI zawhnate a hun taka chhanna pek a nih theihna tura hma an lak dan leh harsatna an tawh sutkian dan turte ngaihtuah a ni a. CIC chuan sawrkar hnathawh danah langtlang taka thil tih a pawimawh thu leh mipuiten thil thleng engkim an hriat theihna tur dikna an neih thu te, chu an dikna chanvo an chan theihna tura SPIO leh SAPIO-te mawhphurhna pawimawh zia te a sawi a. He huna tel te chu vantlang mipui zinga RTI zirtirna kawngah hma la uar tura chahin, RTI chhanna tihkhawtlaia a awm loh nan sawrkar Department hrang hrangte thawhhona leh inpawhna tha zawk neih a tul thu a sawi bawk a. “Right to Information Act hi mipui sawrkar siamna hmanraw pawimawh tak a ni a, Official-ten hei hi kan hriat a, dan leh inkaihhruaina uluk taka kan zawm a tul a ni,” a ti bawk.

He hun hi Mizoram Information Commission-a Secretary H. Dolianabuaia chuan kaihruaiin Mizoram CIC John Neihlaia pawhin mawh-phurhna nei thuneihna hmangtu chuan a thil tih ah mawh a phur ngam tur a ni, tiin “Accountabilty leh transparency a awm chuan corruption a lo tlem dawn a ni,” a ti a. “He dan tha tak hi hmanraw tha tak a ni a, hman a ngai a, hman loh chuan tangkaina a nei lo,” a ti a. A hmang tangkaitu tur chu mipuite an nih thu pawh sawiin, mamawh nei an awm chuan thawktuten tha taka lo tih sak te pawh a tul thu leh huntiam chhunga chhan ngei thin tur a nih thu a sawi a, VCP te chu SPIO-ah leh Public Authority-ah puan an nih tawh thu a sawi bawk.

He hunah hian Information Commissioner Mangjangam Touthang pawhin thu sawiin, zawhna leh chhanna hun hman a ni bawk.