VC term pawh tawi chhan nia Minister in a sawi Party pahnih in chhuanlam tling lo ah an ngai

MNF Sr. Vice President Dr. R. Lalthangliana chuan Democracy ramah sum harsatna chhuanlama mipui thlan VC-te term pawh tawisak chu thil zahthlak tawpkhawk a nih thu sawiin, MPCC Sr. Vice President Lalnunmawia Chuaungo pawhin LAD Minister in VC term pawhtawi chhan a sawi chu chhuanlam tling a ni lo niin a sawi bawk.

MNF Party in nimin-a Aizawl Mizo Hnam Run Chhung Inkhawm an neih ah MNF Sr. Vice President Dr. R. Lalthangliana chuan VC term September ni 7, 2025-a tawp tur chu nasa taka pawh tawi niin, February ni 19th, 2025-ah chhan leh vang mumal awm lovin sawrkar chuan a titawp niin a sawi a, 15th Finance Commission hnuaia Post Devolution kan tih mai, PDRDG a kiam chhoh nasat tak em avangin sum harsatna a awm lo theilo tih sawiin, “Kumtin kan pawisa hmuh tur hi kum 5 hma lamah kan hre lawk vek tawh a, Urban Local Body leh Rural Local Body atana kan sum hmuh tur, khu lamin min pek tur zat hi kan hre sa vek a. VC inthlan hma chhanah LAD Minister-in a sawi nen chuan inpersan tak a ni,” a ti a. “Democracy ramah sum harsatna chhuanlama mipui thlan ngei, VC-te term pawh tawi sak hi thil zahthlak tawp khawk a ni,” tiin “Sawrkar chuan a duh chuan thuneihna a nei teh reng mai a, mipuiin duh taka an thlante hi MNF leh Congress kha chuan kan sawisa ve vak vak ngai lo,” a ti bawk.

Aizawl Congres Bhavan Golden Hall-a Congress Party in nimin-a Political Session an neih ah MPCC Sr. Vice President Lalnunmawia Chuaungo pawhin LAD Minister in Village Council term an pawh tawi chhan a sawi chu sum harsatna vang a ni tih sawiin, “Hei hi chhuanlam tling a ni lo,” a ti a. “Lushai Hills Village Council Act 1953 Sec 5 hnuaiah sawrkarin pawhtawi theihna a nei a, amaherawh chu a nawm a maka pawhseia pawhtawi theih a ni lo, a chhan leh vang mumal tak a awm tur a ni,” a ti. MPCC Sr. Vice President chuan, “Kan Senior Minister pahnihin tunhnai ah VC ten min thawhpui tha duhlo an ti a, Mipuiten kan aiawh tura kum nga chhunga rorel tura kan thlanchhuahte thawhpui duhlohna hi Democracy kalh a ni. Ram leh hnam hmasawnna atan kan VC te hian thawhpui duh loh an nei ngai lo. Congress leh MNF sawrkarah pawh a awm ngai lo. Thuneihna hman diklohna, hmansualna dik tak a ni. Keini chuan hei hi tha kan ti lo,” a ti bawk.