LAD Minister in VC Inthlan sawnhma sawifiahin Mizoram VC ten High Court-a kal an rel thung

Local Administration Department (LAD) changtu Minister C. Lalsawivunga’n Mizoram Village Council inthlan sawn hma a nih chhan chu State sawrkar sum lama a pachhiat vang a nih thu a sawi a. Hetihlai hian All Mizoram Village Council Association te chuan High Court-ah kal an rel thung a ni.

All Mizoram Village Council Association (AMVCA) hian nimin khan Aizawl-a Dawrpui Multipurpose Hall-ah General Conference hmngin he hun hmanpuitu LAD Minister C. Lalsawivunga chuan Village Council inthlan chungchanga thuthlukna siam chu thil harsa tak a nih thu leh kumthar lamah Mizoram in inthlan pali (4) ngawt a hmachhawn dawn avanga sum leh pai senso a hautak lohna atan Village Council inthlan chu kumin sawrkar tangka kum chhunga buatsaih mai tura an tih tak thu a sawi a ni. Minister chuan VC te inenkawlna dan chu kum 1953 daih tawha zam a nih thu sawiin, Lushai Hills Village Council Act chu a hunlaia dan tha tak ni mah sela, kum 71 lai hman a nih tawh avang leh tunlai changkanna leh hmasawnna nena inhne rem lo a tam tawh avanga siam that a ngai tawh takzet tih a sawi a. Hemi atan hian hun hmasa lama sawrkar pawhin an theihtawp an lo chhuah tawh thu leh LAD lam hotute leh mithiam, hemi atana ruat bik ten Dan thar a awm vat theihna atana hma nasa taka an lak thu a sawi a, dan thar Mizoram Village Council Act 2024 chu Law Department-ah a Draft Bill chu endik tura a awm mek thu a sawi bawk.

LAD Minister chuan VC kalkhawmte chu sawrkar laipui atanga hmasawnna tura sum an dawnte chak tak leh fel fai taka hmang vat turin a hrilh a, sum hman lawk loh leh muang taka hma-sawnna hna thawh chuan a hnu leh zela sawrkar laipui atanga sum rawn kal leh turah harsatna a siam thin thu sawiin, Mizoram hmun hrang hranga Village Council-te Pisa, Panchayat Bhavan sak mek pawh a lo sa hmasatu ten hna an thawh muan avangin a hnu leha sa turte tan harsatna nasa tak a thlen thu a sawi bawk.

All Mizoram Village Council Association hian sawrkar in VC te Term a pawhtawi chungchangah hian inrawnkhawmna neiin Village Council zahawmna humhim nan Gauhati High Court Aizawl Bench-ah khinlet an rel a, hemi atan hian Rs. 500/- zel thawh an rel bawk a ni.