Kan thlahtu tobul ka chhuichhuah dan-3
Kan thlahtu tobul ka chhuichhuah dan-3
Thupui pakhat ‘Kan Thlahtu Tobul Ka Chhui Chhuah Dan’ tih hmangin thuziak (article) kan chhunzawm zêl rih dâwn a. Kar kalta khan Bible atanga kan thlahtu bul ka chhuina ka rawn ziak tawh a. Kan pi leh pute khan thuziak dahthat tur mumal an neihlohna kha kum 2000 chuang lâi ni tawh mahsela an thurochhiah leh thawnthu in hrilhchhawn hmangin an nihna an lo vawng nung zêl a. ‘Hmânlai chuan mawm!’ tih kha an literature leh library tha lutuk mai chu a lo ni. Chung an thurochhiah leh thawnthute han zirchian leh han belhchian hian Bible thu behchhan deuh vek a lo ni. Chuvang chuan Bible hi kan chanchin ziahna bu a lo ni ve reng tih a chiang a ni. Tun tumah chuan hnam dang leh ram dang miten kan nihna an lo sawi leh ziah dan hmanga ‘Kan Thlahtu Tobul Ka Chhui Dan’ ka ziak dawn a ni.
Kum tam tak kan bo tawh hnuah Lalpa’n kan chenna tura a lo ruat lawk, ram tiam (promise land) kan thleng a. He ram kan thlen hnu a kan chanchin ziaka dahtu hmasa ber chu British mite an ni. Chungmite chuan engtin nge kan chanchin an lo sawi a, tutenge ni a min lo hriat tih kan ziak dawn a ni. Heng kan ziah turte hi an mahni lehkhabu ziak leh an Diary bu atanga lak chhuahte an ni. British mi- Sawrkar aiawh leh Missionary ten ‘Luz Israel’ kan nih dan an sawite kan ziak dawn a ni. Luz chu Kanan rama khaw pakhat kan pu Jakoba hnena Pathian Vantirkoh inlarna khaw hming a ni. Jakoba (Israela) khan Bethel Pathian In ti a hming thar a lo vuah tak kha a ni. He Luz (Bethel) chungchang hi Genesis 28:19, 35:6, 48:3 ah te chiang takin kan hmu. Zofate zinga Thlarau Thianghlim harhna hmasa ber 4/4/1906 a changtute kha mi 10 an ni a, an channa hmun Aizawl Chaltlang Veng-ah Bethel lung phun a ni. Kum 1989- 1990 kum vel a Mizorama harhna ropui tak kha ‘El-Bethel’ Speaker Evan K. Lalhmingliana rawngbâwlna a nih kha. Tuna kan rama rawngbawltu lâr tak Pathian mi hman mêk Tv. Frederick Lalrindika te rawngbawlna team hming pawh Bethel Ministry a ni.
1. Captain Brown : Mizorama Political Officer hmasa ber a ni. Lusei lal Suakpuilala nen indo lo turin inremna thuthlung ni 21 July 1887-ah an ziak. Chuta a thusawi chu- “Mr.Suakpilal Israel khawchhak lam mi i ni chiang a, I chenna hmun pawh hi hnehchhuh a i lak a ni lo. Vawiin July 21, 1887 hian Ui dum leh Ar sen hmangin indo tawh lo turin remna thu kan thlung a ni,”. Inremna atan thil pek pali- (1) Tangkaraw No (2) Sum airia (3) Huntung Saichuang leh (4) Dartawnsuk a hlan a, hei hi a tunuin Maubawk-ah a la kawl tha. September 9, 1890 khan Changsil sipai hmunah British sipai 18 chauh hruaiin a kal a. Lusei lal Thansuma leh a ho mi 300 laiin an lo lambun a, an that. A thattu hi Saithawma a ni.
2. Major John Shakespeare: British sipai hotu a ni a. Kum 1889-1890 Chin – Lushai Expedition an tih mai, sapho in min rawn beihna a hruaitu a ni. Mizo leh Vai Chanchinbu tih leh Mizo Zirtirna Bu ti chhuaktu a ni. Zofate hi Zo kan nih tih hriain chu kan nihna sawifiah nana Lusei tawnga mihring tih kan sawina ‘Mi’ tih belh a ‘Mizo’ min lo titu a ni. Aizawl a Raj Bhavan ruahmantu a ni bawk. Farkawn leh Vaphai ramri a phun tumin Zofate chanchin chu hetiang hian a lo ziak a ni: Vawiin ni 26, November 1911 ah hian kei, Major Shakespeare Luz Israel rama Superintendent hian British sawrkar aiawh hian Farkawn leh Vaphai inrina tur hi ka phun a ni.
3. Captain Lipton David : A ni pawh hi British Sawrkar in min awp laia sipai lal te zinga mi a ni a. Kan pi leh pute nena indo tawh lo tura remna thuthlung an ziah a kan nihna a ziah danah chuan ‘Luz Israel’ min lo ti thlap tawh a ni. “Vawiin November ni 25, 1890 ah hian Hauchema Sailo, Luz Israel hnam aiawh leh kei, Brtish Sawrkar aiawh hian kan ram pahnih inkarah tumah inthat tawh lo tur leh unau anga awm turin vawiin atanga chatuan thlengin inremna thuthlung kan siam a, kan puang a ni”. He inremna atan hian Lungtian khuaah vawk lian tak kan talh a ni. (He Lungtian khua a tih hi tunah Bangladesh ram chhungah a awm).
4. Captain Merville : Ni 22/9/1890 hi British tan chuan ni lungchhiat-thlak tak a ni, a chhan chu kan sipai hotu huaisen Lieutenant Swinton chu Israel Hnam bo ten an that a, a thattu hi Thatrihloot Longtitude degree 75-100 leh Latitude degree 15-33 a chengten an that. He thu hi Lieutenant Swinton hriatreng nan a diary-ah September 22, 1890-ah a ziah lehlin a ni.
5. A.S. Reig, MB, LMGMO : “Keini British Sipaite chuan vawi tam tak Chin Hills, Kachin Hill a awm Luz Israel hnamte chu tukdawlh a, hneh kan tum thin a. Hneh an har em a, a chhan chu hnam kawlhsen leh huaisen tak an ni. Midangte aiin an mahni hi an in dah sang êm a ni. Thian ah siam tum mai ila kan tan a tha zawk ang.” ( May 22, 1893 ah Zofate chanchin a diary a ziah lehlin a ni).
6. J.H. Lorrain (Pu Buanga) : A ni hi chu kan hriat angin kan rama missionary lo kal hmasa Pu Buanga kan tih kha a ni. A ni pawh hian a diary ah Lunglei a an awm laiin Leite pukah a tawngtai a, a tawngtai laiin thlarau pawlna a dawng a, chutah chuan “I chenna ram hi Israel hnam bote an ni a, mahse hrilh suh, I hrilh chuan chanchintha I hrilh an awih duh lovang” tih thu a dawn a lo ziak.
7. Ms. Chapman (Pi Zirtiri) : Baptist Zosap missionary niin kum 1927-1945 thleng zirtirtu hna a thawk. Rev. Lianzuala pa hnenah Ms. Chapman hian hetiang hian a lo sawi- “Mizote nunphung ka zir hian Israel thlah in nih ka ring tlat a ni, in tlawmngaih dan te, in nunho dan te leh miretheite indawm kan dan zawng zawng te ka hmuh hian Pathian nung be tawh thin in ni tih hi a hmuh theih a ni,” a ti.
Keimahni pawhin kan nihna kan hriat ve hma daihin British mite thuziak atang hian keini Zofate hi tudang nilovin Zosefa tu leh fate, Kanan rama Luz (Bethel) khaw chhuak dik tak kan lo ni tih hi ka chhuichhuah dan chu a ni. He khua hi Judai ram (Chhim lam lal ram) nilovin Israel ram (Hmar lam lal ram) Kanan ram chhunga awm a ni.
Comments
Post a Comment