Zirtirtu semrual loh avanga zirlai khawngaihthlak tam

School Education Minister Dr. Vanlalthlana chuan Zirtirtu insem rual loh lutuk vanga zirlai khawngaihthlak tak tak a hmuh hnem thu a sawi.

Mizoram Government Secondary School Teachers’ Association (MIGOS-TA) General Conference vawi 13-na nimin-a Aizawl Chanmari Hall-a neih a hmanpuina ah Education Minister chuan Zirna chu ram hmasawnna bulpui a nihzia a hriat thu leh zirna In hrang hrang a tlawhchhuah hnem tawh thu te sawiin, Zirtirtu insemrual loh lutuk vanga zirlai khawngaihthlak tak tak a hmuh hnem thu leh a ngaih pawimawhzia a sawi a. Zirna siamtha turin sawrkarin theihtawp chhuahin hma a lak mek thu sawiin, Zirtirtute pawh tunlai khawvel changkanna mil zela in update zel turin a chah bawk.

Sawrkar School ni thei tura tihtur pawimawh hrang hrangte sawi langin Education Minister chuan, VSK app hmangin thil engkim enfiah theih reng a nih tawh thu te, nakinah phei chuan KAI app hmangin attendance te pawh la en vek tur a nih thu a sawi a. “Mirethei te kan khawngaiha kan chawikang duh a nih chuan Zirna kan ngai pawimawh tur a ni tih hi tun Sawrkarin a ngaih pawimawh a ni,” a ti bawk.

MIGOSTA School hi Mizoram khaw hrang hrangah 129 awm mekin thawktu mi 900 vel awmin zirlai naupang 6000 vel an enkawl mek a. Kumin chhungin an Member boral mi 13 leh Member Pension a chhuak mi 6 an awm a ni.