Synod Social Front zirchianna ah Mizo mipa thihna thlentu tam ber Zu nia tarlan a ni

Mizoram Presbyterian Church hnuaia Synod Social Front in zirchianna an neihah Mizo mipate thihna thlentu tam ber chu zu a ni tih an hmuchhuak.

Kum 2022-a Synod inkhawmpui-ah 'Mizo mipa thi rate sang mek a ziaawm theih nan Synod in hma la rawh se' tih thu kal zelah Synod Social Front hian thla 6 (January 2023 atanga June 2023) chhunga mipa thihna hi an zirchiang a. Aizawl khawpui chhunga Kohhran leh District khawpuia Kohhran 256-ah zawhna thawnchhuakin heng Kohhranho atanga chhanna an dawnah Mizo mipa thihna thlentu tam ber chu Zu a ni tih an hmuchhuak a ni. Synod Social Front chhanna dawn atanga a lan danin thla 6 chhung hian Kohhran 256-ah hian mipa thi 1249 an awm a. Kum bithliah lova thihchhan tam ber chu Zu niin natna dang vanga thi chu pahnihna a ni a, zuk leh hmuam vanga thi leh drugs vanga thi ten an dawt a ni. Zirchianna tarlan danin thi zinga 798 (63.89%) hi kum 15-59 inkar, eizawn nana hna thawk tura ngaih an ni a, midang 432 (34.59%) hi kum 60 leh a chung lam, eizawn nana hna thawk lo tura ngaih niin mi 19 (1.52%) chu kum 14 hnuailam, eizawn nana hna thawk lo tura ngaih te an ni bawk.

Kum bithliaha thih chhan tam berah chuan kum 14 hnuai lamah natna dang niin kum 15-59 inkarah Zu a ni a, Drugs, natna dang leh zuk leh hmuamin a dawt a. Kum 60 chin chunglamah natna dang, Zu, zuk leh hmuam leh drugs in a dawt bawk a. A pumpuia khaikhawmnaah chuan Zu hi mipa thihna thlentu tam ber a ni. Zirchianna tarlan danin January-June 2023 chhung hian Mizoram-ah Zu vanga thi 663, Drugs thihpui 145, zuk leh hmuam vanga thi 170 leh natna dang vanga thi 271 an awm a. Thla 6 chhunga thi 1249 atanga chhutin Zu vanga thi 663 hi thi zawng zawng zatva aia tam 53.08% an tling a. Drugs vanga thi 11.61%, zuk leh hmuam vanga thi 13.61% leh natna dang vanga thi 21.70% an awm a ni. Zirchianna neih hun chhung hian kum 14 hnuailam Zu vanga thi an awm lova, kum 15-59 inkar Zu vanga thi hi mi 532 leh kum 60 chung lam zu vanga thi 131 an awm a ni.

Synod Social Front hian thihna thleng zirchiangtu tur hian mi 3 ruatin heng mite hian mithiam 3 dang phungbawma sawmin thihna thleng chungchang hi an zirchiang a, Mizoram-a Kohhran lian zual 10 inchhiarna (2021-2022) atanga a lan danin UPC (Mizoram) leh Seventhday Adventist Kohhran-ah chiah hmeichhia an tam zawk a. A bak zawng Presbyterian, Baptist, Savation Army, UPC (NEI), ECM, LIKBK, Catholic leh IKK-ah chuan hmeichhia an tam vek a ni.