Lunglei helna tur kawngpui sawihona neih a ni

Lunglei khawpui helna kawng (by-pass road) sial tura ruahman chu nimin khan Lunglei District Bawrhsap R. Lalthazuala hovin Lunglei DC Conference Hall-ah sawiho a ni a. Lunglei by-pass road atana NHIDCL lamin kawng kalna tur (alignment) an ruahman chhin pali leh PWD lam atanga ruahman chhin pahnih chu he hunah hian thlirho a ni. Kawng kal dan tur riruang duan lawk dan chuan, Lunglei by-pass road hi Tlawng Lei chhak, Saza Bangla chhak deuhvah kawng pangngai atanga pengin, tlaklam zai zaiah fual deuh hlekin Lunglei khawpui a hel ang a, Sazaikawn kawng pengthuam laiah a chhuak phei dawn a. A pen tanna atanga a tawp thleng hian KM 21.55 vela thui ni tura ngaih a ni. He sawihona ang hian Detailed Project Report (DPR) ruahman a ni dawn a ni.