District Jail Lunglei-ah ‘House Wiring Training’ buatsaih

District Jail Lunglei-ah ‘House Wiring Training’ buatsaih niin nimin khan he Training hi Addl. DC Rochuangkimi Khenglawt chuan a hawng a ni.

Lunglei District Bawrhsap R. Lalthazuala hmalaknaa HDFC RSETI hnuaia District Jail Lunglei-a House Wiring Training hawnna ah hian Addl. DC chuan HDFC Bank atanga RSETI hnuaia thiam thil inzirtirna hun buatsaih theih a ni chu lawmawm a tih thu sawiin, training turte pawh rilru leh tihtak zeta training tur leh eizawnna ngelnghet atana hmang thei tura chhawrtlak thiamna puakchhuah tum theuh turin a chah a. District Jail in Krismas leh Kumthar vuakveta an hman atan Rs. 20,000/- a hlan bawk.

District Jail Lunglei-a HDFC RSETI hnuaia House Wiring Training buatsaihah hian a bul tan nan training tur mi 34 thlanchhuah phawt an ni a. Anni hian ni 30 chhung training an nei ang a, an zir zawhah Ministry of Rural Development hnuai atangin NSQF Qualified Certificate hlan an nih dawn bakah, HDFC atangin an bultanna tur remchang ruahman sak an ni dawn bawk a ni.