Mizoram-a raltlan rawn lut te a huho-a an awm lailawkna tur ruahman a ni dawn

Home Minister K. Sapdanga chuan raltlan te a huho-a an awm lailawkna tur ruahman a ni dawn tih sawiin, Manipur buaina chu State dang a nih avangin an unau te thlavang hauh kawngah Official-a sawrkar in hma a lak a rem loh thu a sawi bawk.

Tunhnaia thuthar lakhawmtu thenkhat ten an kawmna ah Home Minister K. Sapdanga chuan Bangladesh leh Myanmar bakah Manipur buai avanga sahimna zawnga Mizoram-a raltlan te chu Hall-a khungkhawma mi khawngaihna changa sawrkar, tlawmngai pawl leh mipuite chawm ringawta awm lovin, anmahni in hna an thawha huan te siama an in chawm theih nan an awm lailawkna tur ngaihtuah chu High Level Committee on Indigenous Displaced People in tha a tih thu a sawi a, hemi chungchang enfiah tur hian Committee Vice Chairman Lalmuanpuia Punte chu tunhnai khan chhim lamah tirh a nih thu leh a thil hmuh dan te an thutkhawm hunah a thlen tur thu a sawi bawk.

Home Minister chuan raltlan te awmna tur hmun thlansa a la awm lo tih pawh sawiin, chhimlam-a Bangladesh leh Myanmar atanga raltlan te awmna tur chu CADC chhungah ram ruak a tam tih report an dawn thu a sawi a, Champhai-ah pawh sa mekin, Manipur atanga raltlan te awmna tur chu zirchian la ni chiah lo mah se Kolasib District-ah ngaihtuah tha an tih thu a sawi bawk a. Raltlan te chu heng hmun ah hian an awm nghet dawn tihna a nih loh thu pawh a sawi bawk.

Home Minister chuan Manipur buaina leh hemi kaihhnawiha thil thleng mek chu sawrkar in a en liam mai lo tih pawh sawiin, Manipur chu State hran a nih avangin Zohnahthlak te thlavang hauh kawngah Official-a sawrkar in a thlavang hauh a rem lo tih a sawi a, Campaign laia an lo sawi tawh angin Manipur-a Zohnahthlak ten Party ang leh sawrkar angin an hruaitute hmel thum thum an hmu tawh a, hei hi puanzar vak vak chi a nih loh avangin mi thenkhat in hma la lo anga an sawi chu an hriatchian loh vang a nih thu a sawi bawk.