Civil Hospital Aizawl-ah thisen thliarhranna khawl pe

Ashraya Hastha Trust, Bengaluru, Karnataka ten Civil Hospital, Aizawl-a Thisen thliar hranna khawl, Apheresis Machine an pek chu nimin khan inhlanna hun buatsaih a ni.

Apheresis khawl inhlanna hun hi Civil Hospital, Aizawl-a Sr. Medical Superintendent Pisa-ah neih niin Ashraya Hasta Trust Director NK. Sharma chuan Health Minister Lalrinpuii hnenah he khawl hi a hlan a, Mizoram in a mamawh Apheresis khawl Civil Hospital, Aizawl hnena an hlan thei chu an lawm thu sawiin, “Hetianga ke kan pen theih nan a kawng lo sialtu, Bengaluru-a kum tam tak lo awm tawh leh Kannada tawng te pawh thiam Health Minister Pi Lalrinpuii hnenah pawh lawmthu ka sawi takzet a ni,” a ti a. Ashraya Hasta Trust hi Non-Profit Organization a nih thu leh, India ram State 26-ah kum upa leh tar chak lo zawk te, mirethei leh chanhai te tan hriselna kawngah leh kawng hrang hrangin chhawmdawlna hna an thawh mek thu a sawi bawk.

He hunah hian Health Minister Lalrinpuii chuan Associaition for Voluntary Blood Donation (AVBD) leh mimal tlawmngai ten theihtawp chhuahin Blood donation drive hi kalpui thin mahse kan Civil Hospital-ah te thisen indaih tak tak a har thin thu leh Blood Bank a thisen te hi inrenchem taka hman a ngai fo thin tih a sawi a. “Kan lo tih thin dan (Traditional method) ah chuan Donor thisen-a component thenkhat: Plasma, White Blood cell (platelets) etc.chauh mamawh heng natna: Thin tha lo, Leukemia, Dengue, Cancer etc. tan pawhin donor chuan a thisen kha a ngai ngaia a pek tho a ngai thin a. Apheresis khawl chuan thisen component mamawh chauh a lakchhuah zawhah, a lakchhuahna hnu thisen bang zawng kha donor hnenah a pelet leh dawn a ni,” a ti a. Heng bakah hian patient khan mi dang dang thisen a dawn a ngaih tawh dawn loh avangin natna inkaihchhawn palh thei lakah pawh a him zawk tawh dawn a ni, a ti.

Health Minister chuan Mizoram in Apheresis Khawl kan mamawh zia te hria a Ashraya Hasta Trust in an lo pawmsak chu an lawm takzet tih sawiin, tun hi a tawpna ni mai lo se, hmalam hunah pawh tanpui chhunzawm zel turin Ashraya Hasta Trust te chu a ngen nghal a. Civil Hopital a thawktu te hnenah pawh fimkhur tak leh dim taka khawl chu hmanga enkawl zui tura chahin, Operation leh Maintenance-ah buaina a awm loh nan Official ten bawhzui ngai chu a siamtu company lamah lo bawhzui turin a chah bawk a ni.

Apheresis Machine hi cheng nuai 60 man vel a ni a. Tuna Mizoram-a kalphung (traditional method)-ah chuan damlo pakhat Platelets (white Blood cell) pe turin thisen petu (donor) pathum mamawh ni ta se, Apheresis khawl hman chuan thisen petu mi pakhat chauh pawhin a pe thei tawh dawn a ni.