Mizoram-a raltlan te hnena buhfai sem tur District hrang hrangah phurh thlen a ni tawh

Food, Civil Supplies & Consumer Affairs (FCS&CA) Department chuan Mizoram-a raltlan awm mek mi 40,000 chuang hnena a thlawna sem tur buhfai chu District hrang hrangah an phur thleng kim tawh a, heng te hi District hrang hranga thuneitute kaihhruaina hnuaiah semchhuah tur a ni ang.

FCS&CA Department hotute hnen atanga Akashvani Aizawl-in thu a dawn danin Ministry of Home Affairs (MHA)-in cheng vbc. 5 a pek atanga Food Corporation of India (FCI) hnen atanga buhfai an lakchhuah hi Metric Tonne 1,379 leh quintal 30 a ni a. FCI lamin lakchhuah phalna (release order) an pek atanga lachhuak nghalin sawrkar laipui huntiam, ni 60 ralhma a phur chhuakin Mizoram-a District 11 hmunpui theuh ah phurh thlen a ni tawh a, District Bawrhsap te'n Home Department ruahmanna siam lawk angin a thlawnin an sem chhuak dawn a, District thenkhat chuan an semchhuak tan tawh bawk a ni.

Tunhnaia Home Department-in sawrkar laipui hnena raltlan awm zat an thawnah chuan Mizoram-ah 43,788 an awm mek a. Heng te hi Myanmar atanga raltlan mi 33,764 bakah Bangladesh atanga rawn raltlan mi 2,014 niin Manipur atanga sahimna zawnga Mizoram-a awm mek mi 8,010 an ni a. Hetihlai hian Mizoram-a raltlan awmte hi a changin an pung a, a changin an tlem ve leh thin bawk a ni.

FCS&CA-in raltlan tana buhfai sem tur an thlen tam zualte chu Champhai, Lawngtlai, Aizawl leh Siaha District-ah te a ni a. Champhai District-ah hian buhfai quintal 4,533 thlenin, Lawngtlai District-ah quintal 2,526 thlen a ni a, Aizawl District-ah quintal 2,458 leh kg. 40 leh Siaha District-ah quintal 1,875 te phurh thlen a ni bawk.

District hrang hrang zinga buhfai phurh thlen tlemna ber chu Khawzawl District niin quintal 46 chauh a thleng a, Serchhip District-ah quintal 119 leh Mamit District-ah quintal 184 te phurh thlen a ni bawk a, heng te hi raltlan awm mek tlemna deuh te an ni. Home Department lamin ruahmanna an siam dan chuan raltlan pakhat zelin buhfai kg. 31.5 zela a thlawna sem phawt tur a ni ang.