International Paragliding Accuracy Championship 2024 atan inbuatsaihna kalpui mek a ni

Thla thar December 9-13, 2024 chhunga Serchhip in ‘International Paragliding Accuracy Championship 2024’ a thlen tur atana inbuatsaihna kal mek a ni a, niminpiah khan Serchhip District Bawrhsap Paul L.Khuma hova ruahmanna te siam a nih hnuah nimin khan sawrkar Department thenkhat aiawhte, MASA Serchhip Hqrs. hruaitute bakah chanchinbumite chuan Zawlpui Phai-a an hmunhma tur an tlawh bawk.
International Paragliding Accuracy Championship 2024 neih tur chungchang ngaihtuah hian niminpiah khan Bawrhsap Paul L. Khuma hovin Serchhip DC Meeting Hall-ah thutkhawm neiin inbuatsaihna kalpui dan thlirho a lo ni tawh a. He intihsiakna a tel turte Bawngchawm tlang-a an thlawhchhuahna hmun tur (Take-Off point) panna kawng awmsa chu One-Way-a hman tura ruahman nise tiin an rel a; a panna kawng pakhat zawk, Sailiamkawn atanga kalna chu PWD hmalaknaa lirthei kal theih tura siam nise tih niin lirthei kal velte lo vil turin Serchhip Traffic Police te ruat an nih bakah dan leh thupek kenkawh hna thawk turin Serchhip Police te beisei an ni a. Ambulance Duty turin Serchhip-a 42nd Assam Rifles te leh Dawngzawl-a BSF Ambulance te beisei niin Faina leh thianghlimna lam Duty turin Assam Rifles leh NSS Govt. Serchhip College te beisei an ni dawn bawk a ni.

He Championship neih tur denchhen hian a tumna tur (Landing Side) Zawlpui Leilet zawl-ah Festival ropui taka buatsaih nise tih a ni bawk a. Horticulture Department ten thei tui, thei leh thlai tharlam tak takte phochhuahna tur lo buatsaih se; Mizo kutchhuak thilsiam chi hrang hrang phochhuah nise an ti bawk a. Fisheries Department te hmalakna in Nghakuai inchiahsiak buatsaih a ni anga, Sangha tharlam tak tak lei tur phochhuah a ni ang. Heng bakah hian Tui thianglim in tur leh inthiarna te buatsaih turin PHE Department ruat an ni a. Free Concert ropui tak buatsaih tum niin, man chawia Baloon hmanga Vansang a thlawh kualna (Hot Air Baloon) pawh buatsaih tura ruahman a ni bawk.

He Championship a tel tur hian India ramchhung mai bakah ram 13 atangin Glyder/Pilot thahnemtak an inziak lut tawh a, an vaiin Pilot 60 chuang tel thei leh tura beisei a ni.