Ramsa in ranvulh a tihhlum sak te zangnadawmna pek thin tihpun ranvulhtu ten an tangkaipui beisei a n

State Board of Wildlife chuan Ramsa in ranvulh a tihhlum sak te hnena zangnadawmna a pek thin chu tunhnai khan a tisang a. Hetianga zangnadawmna pek thin tihsan a ni hi ranvultuten an tangkaipui a beisei thu AH&Vety Department Director R. Zothanmawii chuan a sawi.

AH& Vety Director R. Zothanmawii chuan hmun thenkhata ranvulhtu, a bik takin Sial vulhtute, an Sial vulh ramsa in a tihhlum sak avanga harsatna an tawh thin thu a sawi a. Hei hi ranvulhtute tan channa nasa tak a nih thu sawiin, Zangnadawmna lo pek tawh thin chuan an harsatna engemaw chen sukiang mahse an ran hlutna atanga tehin a beitham thin tih a sawi a. Tunhnaia Chief Minister hova State Board of Wildlife thutkhawm vawi 10-na chuan zangnadawmna pek thin a tisang chu lawmawm a tih thu leh helama harsatna tawk te tan thil tangkai tak a nih a beisei thu a sawi a ni.

State Board of Wildlife in zangnadawmna rate thar a pawm danin ramsa in a tihhlum Sial leh Bawng-ah Rs. 37,500 a pek thin chu kum khat hnuailam ah Rs. 40,000 leh kum 1 aia upa ah Rs. 80,000-ah tihpun a ni a. Tlangram Bawng (Hill Cattle)-ah Rs. 37,500 pek thin chu kum 1 hnuailam ah Rs. 15,000-ah leh kum 1 aia upa-ah Rs. 30,000 in a ti danglam a. Ramsa in Vawk a tihhlumah kum 1 hnuailamah Rs. 15,000 leh kum 1 aia upa ah Rs. 40,000 pek thin a ni dawn a, Kel leh Beram a tihhlum a Rs. 4000 pek thin chu kum 1 hnuailamah Rs. 2000 leh kum 1 aia upa ah Rs. 5000 pek a ni tawh dawn a, Ar bikah Rs. 100 pek thin chu kum 1 hnuailamah Rs. 100 leh kum 1 aia upaah Rs. 300 a ni tawh dawn a ni.

Hei bakah hian AH&Vety Department hotute sawi danin ranvulhna In tihchhiatah Rs. 3000 pek thin chu, a chhunga an vulh ran kum 1 hnuailam a nih chuan Rs. 40,000-ah leh kum 1 aia upa ah Rs. 80,000 pek a ni tawh dawn tih an sawi bawk a ni.