Mizoram-a VC dinglai te Term tih tawi niin LAD Minister in Inthlan buatsaih hma chhan a sawifiah

Mizoram sawrkar chuan Autonomous District Council huamchhung tiam lohin Mizoram-a Village Council dinglai te term chu kumthar February 19-a tawp turin a titawi a. Hei hi State sum leh pai te fimkhur tak leh daihzai taka enkawl leh hman a tul vanga tih a nih thu LAD hotute chuan an sawi.

Mizoram-a Village Council dinglai te term pawhtawi chungchangah hian nimin khan Mizoram sawrkar-a LAD changtu Secretary Teresy Vanlalhruaii chuan hriattirna tichhuakin Section 5 of the Lushai Hills Disrict (Village Council) Act 1953 in thuneihna a pek angin Mizoram Governor chuan Mizoram-a Village Council dinglai te term chu February 19, 2025-a tawp turin a tihtawi thu leh hei hian Mizoram-a Autonomous District Council pathum hnuaia Village Council te erawh a huam loh thu a tarlang a. Hei hian hemi chungchanga November 20, 2024-a thuchhuah lo siam tawh chu a luahlan thu a tarlang bawk a ni.

LAD changtu Minister C. Lalsawivunga chuan Mizoram sawrkarin Village Council inthlan a sawn hma chhan ber chu kan State sum leh pai te fimkhur tak leh daihzai taka enkawl leh hman a tul vang a ni ber tih nimin khan thuthar thehdarhtute hnenah a sawi a. 15th Finance Commission period zuih ral lamah kan awm mek tih Minister chuan sawiin, “He 15th Finance Commission hian 14th Finance Commission ang lo deuhin recommendation an siam a. Chu an recommendation-ah chuan kan sum hnar lian ber zinga pakhat, Post Devolution Revenue Deficit Grant chu kumtin an titla hniam zel a ni,” a ti a. 15th Finance Commission hun chhung hian Mizoram chu cheng vbc. 6544 dawng tura a tih thu leh kum 2021-22 chhungin cheng vbc. 1790; kum 2022-23 chhungin cheng vbc. 1615; kum 2023-24 chhungin cheng vbc. 1474; kum 2024-25 chhungim cheng vbc. 1079 leh kum 2025-26 chhungin cheng vbc. 586 dawng tura min tih thu a sawi a. “A thla bi anga chhut chuan Nikum Financial Year (2023-24) chhung khan thla tin cheng vbc. 122.83 Mizoram sawrkarin a dawng thin a. Kumin kum kal mekah hian thla tin cheng vbc. 89.91 kan dawng bawk a. Nakum Financial Year (2025-26) ah chuan nasa taka tlakhniam belh lehin thla khatah cheng vbc. 48.83 vel chuah kan dawng tawh dawn a ni,” a ti.

Dan pangngaia a kal chuan nakum Financial Year chhung hian Election lian pui pui pali buatsaih a ngai dawn tih Minister chuan sawiin, “Village Council leh Local Council Election te hi August/September thla ah, LADC inthlanpui hi November thla bawrah neih leh a ngai ang a. 2026 January/February thlaah AMC inthlan huaihawt a ngai leh dawn bawk a ni,” tiin “Nakum Financial Year chhunga kan Post Devolution Revenue Deficit Grant nasa taka tlahniam tur kara inthlan hautak tak pali, nuai engemaw zat liamna tur han hmachhawn hi sawrkar sum bawmah nghawng lian tham tak a neih loh nan Section 5 of the Lushai Hill Distrct (Village Council ) Act, 1953-in sawrkar thuneihna a pek chu a taka hman a thain kan hria a. Chuvangin nakum lama Election neih tur pali zinga a hautak ber VC Election bik hi sawn hma ta mai ila, kan sum leh pai dinhmun engemaw chen kan chhawk zangkhai thei ang tih ngaihtuah chunga he decicion hi siam a ni,” a ti a ni.

LAD Minister chuan kumin te, nikum lam te khan kan sum dinhmunin duhthu sam lo deuh mah se a pangngaia inthlan hi sawrkarin a kalpui theih beisei a nih thu sawin, “Nakum bik hi chu a ring a rek em mai a, tun atangin fing taka inpuahchah a ngai niin kan hotuten an hria a. Sawrkar sum dinhmun a chhiat hian a tuar bertu chu mipuite bawk an nih thin avangin VC inthlanin mipuite ah nghawng na taka a neih loh nan tihian kan ti ta mai a ni. Engkim hi mipuite hmangaihna vanga tih a ni,” tiin VC Term pawhtawi chhan hi a sawifiah a ni.