East Lungdar-ah Hleilenna tuar hmeichhiate leh hmeichhe baihvai te chawmdawlna In hawn a ni

Hleilenna tuar hmeichhiate leh hmeichhe baihvai te chawmdawlna In (Gender Resource Centre) tur chu nimin chawhnu dar 2:00 khan East Lungdar-ah hawn a ni.
East Lungdar RD Block hnuaia Buhzem CLF huamchhunga hleilenna tuar hmeichhiate leh hmeichhe baihvaite chawmdawlna In (Gender Resource Centre) hi East Lungdar RD Block-a BDO leh BMD Peter Malsawmtluanga chuan nimin tlai khan a hawng a, Central sawrkar chuan hmeichhiate chawikanna kawng ah nasa taka hma a lak mek thu sawiin, Hmeichhiate chunga hleilenna doletna kawngah hian DAY-NRLM, Ministry of Rural Development chuan kum 2 (2022 leh 2023) chhung khan kawng hrang hrangin Awareness Campaign a lo kalpui tawh thin thu leh mipui vantlang in hetiang kawnga hriatna nasa zawk an neih a, a tul anga thuneitute hnen thlenga hriattir leh thawhpui a pawimawhzia an hriat theih nan inzirtirna te kalpui a nih thu a sawi a. Heng bakah hian DAY-NRLM hian a hnuaia Institutions hrang hrang - Self Help Group (SHG), Village Organisation (VO) leh Cluster Level Federaton (CLF) ah te nasa takin hmeichhe awmnem zawkte chunga hleilenna chungchang ah zirtirna a pek thin bawk thu a sawi a. Ministry hrang hrang-Rural Development, Women and Child, Panchayati Raj Institution, Legal Services leh Home Affairs ten nen tangho (convergence) in hmeichhiate chunga hleilenna do kawngah leh an dikna chanvo an neih/hmuh ngei theih nan hma a lak reng thu a sawi bawk.

East Lungdar BDO chuan he hmalakna kal zelah hian State Mission Management Unit (SMMU), MzSRLM, Govt. of Mizoram chuan E. Lungdar RD Block hnuaia Buhzem CLF huamchhungah hleilenna tuar hmeichhiate leh hmeichhe baihvaite chawmdawlna In (Gender Resource Centre) din tura rauhmanna siamin Block Mission Management Unit, MzSRLM, E. Lungdar RD chuan a tul anga hma a lak hnuah GRC atan hian East Lungdar-a Saingenga In, Mizopa chhiara chhawng 2-na chu ruahmanin peihfel a nih hnuah hman theih tura hawn a ni ta tih a sawi a. He Project hi kum thum (3) chhung kalpui phawt tura ruahman a nih thu leh a tul anga kalpui zel emaw, tihtawp emaw tur a nih thu a sawi bawk a ni.

Nimin tlai-a he hun hman ah hian Serchhip DRDO Project Director leh DMD Dr. Malsawmtluanga Fanchun bakah MzSRLM-a SMM Raymaond Lalsangzuala te pawhin thu sawiin, kalkhawm te atangin Gender Resource Centre chungchanga hriat tur pawimawh hrang hrang inzawhfiahna hun hawn a ni bawk a. Hemi hnu hian sawrkar laipui-a Ministry of Rural Development chuan New Delhi atangin biakhmuh theihna hmangin GRC, Buhzem CLF, E. Lungdar hi hawnna hun hmang ve lehin he huna tel te hian he hun hi an hmanpui chhunzawm nghal bawk a ni.