Lenkawl

Krishi Vigyan Kendra (KVK) Serchhip District leh Agricultural Technology Management Agency (ATMA) Serchhip District te tangkawp buatsaihin nimin khan 'Sunflower (Oilseeds) Technology' tih thupui hmangin ‘Joint Field Day’ hman a ni a, Tel tharchhuak tura hmalak a pawimawh dan inzirtirna neih a ni.

Serchhip Mat Phai-a Chawm Lei atanga Thinglubul Zau (Kai thumna) panna kawng chu PCC-a siam hna thawh mek a ni.

Cricket Association of Mizoram (CAM) chuan kum 2024-2025 Season-a Vijay Merchants Trophy khelh tur atana Mizoram Under-16 Team tur mi 15 a thlang a, heng zingah hian Serchhip District atangin Hmingthanpuia, New Serchhip chu thlan a ni a, ani hi kar kalta a khelh zawh tak, Inter-District Cricket Tournament-a Best Bowler atan thlan kha a ni.

BJP Party chuan nimin khan Aizawl-a an Office-ah kar thar inhlanna leh Political Session neiin Lok Sabha Inthlanpui neih zawh tak an thlirlet.

Mamit District chhunga khaw thenkhat chu niminpiah tlai khan thli leh rial in nasa taka nuaiin chenna In chhia engemaw zat a awm a, hriat theih chinah Rial tla hian Dampui khuaah In 10, Bunghmun West-ah In 10 leh Tuidam khuaah In 9 tichhiain thli tlehin Bunghmun West leh Tuirum khuaah chenna In pakhat ve ve leh Mamit Luang-pawl-ah motor chhe siamna Workshop pakhat a tichhia a. Khuarel chhiatna tuarte hi Mamit DC Office leh BDO lam atangin a theih chin chinah silpauline sem nghal an nih bakah chhawmdawlna awm thei te buaipui nghal a ni bawk.

Tunhnaia Thli leh rial thawk in Saitual District a chhiatna a thlen hrang hrangte chu nimin khan Saitual District Bawrhsap Dr Lalngura Tlau hmalakna in a hmunah enfiah a ni a, Saitual District a khaw hrang hrangte chuan thli leh rial avang hian tunhnaiah harsatna tawkin tanpui ngai ni a chhinchhiah hi Maite khua ah chhungkaw 36, Tawizo-ah chhungkaw 86 leh Mualpheng-ah chhungkaw 6 an ni a, heng bakah hian enfiah ngai dang te pawh awmin heng enfiah tawh te hi an Bank Account kaltlangin tanpuina pek an ni dawn a ni.

Tunhnai ah ruahtui a tlak mai loh avanga Pialthleng leh Tlawng lui-a pump tur a tam tawk tawh loh avanga Lunglei khawpui in Tui harsatna a tawh theih chungchangah Lunglei Bawrhsap Ramdinliani chuan AMRUT 2.0 hnuaia Tlawng lui khuah hmalâkna Pialthleng Pump House Complex tlawhin, Gravity Impounding Dam siam mek pawh a en bawk a. Bawrhsap hi PHE Department-a SE, Lunglei Circle leh a thawhpuiten lo dawngsawngin Tui an pump dan kalphung te an lo hrilhfiah a, ruah a sur chuan tui harsatna lutuk a awm an rin lo thu an lo hrilh a. Tlawng hnar chhevelah mimal ram neiten ram an vah chereu avanga Tlawng lui kam zel chungchangah hmalak a tul thu an lo thlen bawk a ni.

Nimin-a PC Party Executive Committee thukhawm chuan Party Vice President atan Rita Malsawmi chu an ruat a, Rita Malsawmi hi Mizoram Lok Sabha Inthlanpui neih zawh taka PC Party Candidate kha niin PC Party chuan amah hi nasa taka Party chawisang thei turah an ngaih thu an thuchhuah siam ah chuan an tarlang bawk. Hetianga Vice President an ruat belh hnu hian PC Party-ah hian Vice President mi pahnih, Rita Malsawmi leh Lalthuamliana te an awm ta a ni.

Lunglei District chhunga awm Lungsen khuaa Govt. Middle School-II chu nimin zing dar 6:30 vel khan a kang a, bungrua engmah chuh hman a ni lo. Thudawn danin kangmei chhuah chhan hi hriatchian a ni lo a, kangmei a chhuak tih hriat a nih chuan thelh mih ngaihna awm lovin a kang tawh a, School building leh bungrua cheng nuai 45 hu vel a kangral a ni. School kang hi thuneitute hnenah hriattir ni tawhin zirlai naupang ten zirna an chhunzawm leh nghal theih dan tur pawh buaipui nghal a ni bawk.

MNF Sr. Vice President Dr. R. Lalthangliana chuan Lok Sabha Inthlanpui neih zawh takah Pathian puihna in chak theihna sang tak an neih thun a sawi.

PHE Department changtu Minister Prof. Lalnilawma chuan kan lui tui a lo thianghlim zawk theih nan bawlhhlawh kan sawngbawl dan ah hma kan sawn a ngai tih a sawi.

Chief Minister Lalduhoma chuan Zofate Zoram pawna hnathawk a chhuak te buaipui bik tur Cell a din dawn thu a sawi.

Mizoram-a Autonomous District Council (ADC) pathum te chuan nimin April 29, 2024 khan an dinchamphaphak pualin hun an hmang.

Lunglei khawpui chhung inenkawlna chu Municipal Council hnuaia a awm tak avangin Lunglei RD Block hnuaia awm zinga Lunglei Municipal Council in a huam chin khaw hrang hranga MGNREGS Job Card nei mi 14,200 te chu paih an ni dawn.

Mizoram chhungah Myanmar atanga sahimna zawnga raltlan rawn lut 34,282 an awm mek a, hetihlai hian naktuk atanga India leh Myanmar inkalpawhna khar tum chu khar a ni leh dawn lo tih Assam Rifles bhotute chuan an sawi.

Mizoram Journalists’ Association (MJA) Serchhip District Member te chu India hmarchhak State thenkhat a Pangang khawi kawnga hma an lak dan zirin kar kalta khan Assam leh Meghalaya State-ah an zinchhuak a, Zirtawpni khan Mizoram rawn thlengin an thil hmuh te Chief Minister hnenah an thlen nghal.

Mizoram chhunga District pali (4)-ah African Swine Fever (ASF) leng vangin Vawk 285 a thi leh tawh a, ASF laka invenna atan Serchhip District-a Vawk leh Vawksa lakluh thu ah khapna tihchhuah a ni.

Mizoram District hrang hrangte Cricket-a inelna khelh zawh takah Serchhip District chu a tum khatna atan an Champion.

Presbyterian Kohhran hnuaia Pastor Bial Inkhawmpui chu nimin Pathianni hmang khan Pastor Bial hrang hrangah neih a ni.

Zirtawpni kalta, April 26, 2024 kha ‘World Intellectual Property Day’ niin he ni pual hian Govt. Serchhip College NSS Unit bultumin Govt. Higher Secondary School-ah hun hman a ni, Kumin-a World Intellectual Property Day-ah hian ‘IP and the SDGs: Building Our Common Future with Innovation and Creativity’ tih chu thupui atan hman niin Dr. Jonathan Lalnunsiama, Asst. Professor, Department of Physics chu Resouce Person atan hman a ni a, Intellectual Property Rights pawimawhna leh mi in thiamna tha tak nei mah se IPR a neih loh chuan sumdawnna lian zawk kalpui tura harsatna a awm theih dan te kalkhawmte chu a hrilhfiah a ni.

Baptist Church of Mizoram (BCM) Serchhip Pastor Bial Kristian Naupang Pawl (KNP) In-khawmpui vawi 28-na chu nimin Pathianni hmang khan BCM Biak In, Serchhip-ah neih a ni a, he Inkhawmpui hi Zirtawpni zan atang khan neih niin thupui atan ‘Isua zui’ tih chu hman a ni a, Speaker-ah Jonathan Lianhna chu hman a ni bawk. BCM Kohhran hian April thla-a Pathianni hnuhnung ber ‘Buhfaitham Pathianni’ a an hman thin angin nimin khan tualchhung Kohhran hrang hrangah he ni pual hian hun an hmang bawk a, BCM Finance Department-in a tarlan danin kum 2023-2024 Financial Year chhunga Buhfaitham atanga sum hmuh chu Rs. 1123,96, 958 a ni.

Zonet Cable TV leh Mizoram Journalist’ Association (MJA) tangkawp in ‘Miss Mizoram 2024’ thlanna an buatsaih chu Zirtawpni zan khan zawhfel a ni ta a, Serchhip District aiawh tura thlan R. Vanlalawmpuii chuan ‘Beauty with a purpose’ (BWAP)-ah lawmman a dawng a, a pumpui ah erawh a tling zo ta lo thung a ni. Tun tum ah hian Jennifer Lalrinzuali Renthlei, Republic Hmar Veng chu ‘Miss Mizoram 2024’ atan thlan niin lawmman ah Rs. 2,00,000/- leh Scooter bakah hamthatna hrang hrang a dawng a, Evelyn Zachhingpuii, Saikhamakawn chu pahnihna niin Rebecca Zothanpuii, Khawzawl chu pathumna a ni bawk.

Serchhip Town Piggery Co-operative Society Limited chuan kum 2024-2028 chhunga an pawl hruaitu tur thlanna neiin Chairman-ah K. Remlalliana (Chanmari Veng); Vice Chairman-ah Lalrinzuali (AOC Veng); Secretary-ah F. Lalhruaitluanga (P&E Veng); Asst. Secretary-ah PC. Lalromawia (Zozam Veng); Treasurer-ah Liansangpuii (Hmar Veng) leh Fin. Secretary-ah Lalbiakdika Sailo (Leisang Veng) te thlan an ni.

Inrinni zing khawvar hma khan Khawzawl District chhunga khaw pahnih-ah Rial tla avangin In engemaw zat a chhia.

Mizoram chhungah Myanmar atanga sahimna zawnga raltlan rawn lut 34,282 an awm mek.

United Pentecostal Church (UPC) North East India General Conference vawi 56-na chu nimin Pathianni hmang khan Kolasib Vengthar-ah neih a ni a, Ningani kalta zan atanga neih he Conference-ah hian thupui atan ‘Ngai teh, a ni chu a lo kal e’ tih chu hman a ni bawk. Inrinni khan hruaitu thlanna neiin General Secretary nilai Rev. Zohmingthanzama chu General Superintendent atan thlan a ni bawk.

MPCC President Lal Thanzara chuan an party Dan Bu in thuneihna a pek angin an Party Vice President atana an inthlan hnuhnung bera an thlan, Lalnunmawia Chuaungo, Chaltlang chu Senior Vice President atana a ruat thar a, hemi rual hian Vice President atan mi pathum - C. Ngunlianchunga MLA; RL. Valla, Thakthing Tlang leh Ronald Sapa Tlau, Zonuam te pawh a ruat thar bawk.

Mizoram Upa Pawl (MUP) District Hqrs. Lawngtlai hruaitute chuan tunhnai khan Doordarshan Director Nampibou Marinmai chu hmuin Lawngtlai-ah Community Radio Station din a nih theih nan a hmalak sak turin an ngen a, Lawngtlai District chu hnam hrang hrang chen pawlhna niin, Zirna, Hriselna, loneih leh a kaihhnawih bakah Radio kaltlanga mipui zirtirna tangkai taka hman theihna tur leh hetiang lam hawi mamawhna san em emna District a nih vangin Community Radio Station chu an mamawh hle tih an hrilh a. Nampibou Marinmai chuan MUP ten Radio Station an mamawhzia an thlen chu Information & Broadcasting Ministry pawhin Radio Station din tura a ngaihpawimawh em em a nih vangin theihtawp chhuaha hma lakpui a tum thu a lo hrilh bawk a ni.

Aizawl Municipal Corporation (AMC) thuneitute chuan AMC Ward pahnih-ah inthlan that a ngai tih sawrkar thuneitute hnenah an hrilh a, heng te hi AMC Ward No. VI leh leh Ward No. XIX te an ni.

Car loan pechhuak thin Mahindra & Mahindra Financial Service Ltd. hnuaia hnathawk thenkhat leh Mizoram-a Car Dealer 5 ten loan lem hmanga cheng vbc. 150 vel an tih chingpen chungchang chu Mizoram DGP Anil Shukla chuan Zirtawpni khan thuthar thehdarhtute hnenah a sawifiah.

Mizoram State Project Monitoring Committee (MSPMC) chuan Hualngohmuna hmalakna kal mek, ‘Construction of Solid Waste Management Centre: Phase-I’ chu Zirtawpni khan an tlawh.

Mizoram sawrkarin Ration Card Var neite tan buhfai-a subsidy a pek zat tur ennawn a ni dawn a, a zat tur erawh bithliah fel a la ni lo. Hetihlai hian National Food Security Act (Card Eng leh Card Pawl)-a Mizoram in quota a neih 7,06,296 chu hnawhkhah tawh a ni.

The Rights of Persons with Disabilities Act, 2016-in a phut angin, Public building zawng zawng te rualbanlo tana awlsam taka pan theih tura tih a ni a. Commissioner for Persons with Disabilities (PwD) chu building sak mek leh sak tawhte rualbanlo tan remchang siamsak an nih leh nih loh endik tura thuneihna pek a nih angin endik hna kalpui mek a ni. Hemi bawhzui hian Commissioner leh staff, Persons with Disabilities Office leh rualbanlo reprsentative-te chuan Hospital, Biak In leh Office Building endikin Ramp, Rail, Lift, Signage, Tactile leh Accessible Toilet te an neih leh neih loh endik a ni.

Kum liam ta, 2023-24 (April-February) chhung khan Mizoram tlawhtu khualzin 1,96,880 an awm a, chung zinga mi 3,435-te chu ram pawn atanga kal (foreign tourist) an ni a. Ram pawn atanga Mizoram tlawhtu zingah USA atanga kal an tam ber.

Inrinni zing khawvar hma khan Khawzawl District chhunga khaw pahnih-ah Rial tla avangin In engemaw zat a chhia.

Serchhip District-ah Lok Sabha Inthlanpui atana Vote thlak chu tluang taka zawhfel a ni ta a, Inrinni khan Serchhip District Election Officer David Lalthantluanga hovin Post Poll Scrutiny pawh tluang taka neih a ni.

Mizoram Journalists Association (MJA) Ser-chhip District Member te chu Assam State chhunga Pangang khawina kawnga hmalakna hrang hrang tlawh turin Vawiin hian zinchhuah an tum a, tunkar Zirtawpni-ah Serchhip rawn thleng leh tura beisei an ni. MJA Member te an zin dawn avang hian tunkar-ah tualchhung Chanchinbu te a chhuak thei dawn lo a ni.

Mizoram-ah mi tang (prisoner) 1,386 awm theihna Jail 10 a awm a, hetihlai hian Jail thenkhat ah chuan mi tang awm thei zat (capacity) aia tam tang an awm reng a. Tun dinhmunah damchhung tang tura thiamloh chantir (convict) tawh mi 57 an awm bawk.

Inrinni tlai khan thli leh rial thawkin Kolasib District nuaiin Inchung chhia 150 chuang zet a awm a, heng zinga pakhat chu luahzui tlak lohin a chhia a, heng bakah hian Pathianni lo awm tur hmanga UPC (NEI) India General Conference thlenna tura Kolasib Vengthar-a Pandal sak pawh a chim bawk a ni. Hetianga Inkhawmpuina tur Pandal a chhiat tak avang leh a hun tur a hnaih tawh avangin nimin khan Pandal senghawi hna-tlangpui neih nghal a ni a, Kohhran hrang hrang atangin mi tlawmngai ten an pui bawk a ni. Nizan hmasa khan Aizawl District-a Pehlawn khua ah rial tla in In 48 zet tichhiain heng zinga 8 te chu a chhe nasa zingah a tel a, East Phaileng khua ah pawh rial tla avangin In 121 chhiain heng zinga 7 chu luahzui tlak lohin a chhe bawk a ni.

Mizoram Public Service Commission (MPSC) hna lak dana thil felhlel awm ni a puh chhui chiang tura ruat M. Lalmanzuala (IAS Rtd) chuan Vawiin-ah emaw, naktuk-ah emaw a report thehluh hman a beisei tih a sawi a, an hna chu sawrkar Pisa kal ni, ni 2 chiah an la khawih hman tih sawiin, a thil chhuina-ah hian sawrkar chuan amah pui turin Deputy Secretary pahnih an pek thu leh MINECO a Secretariat-ah pisa tur an ruahmansak thu a sawi a. MPSC a thawkte chawlhtir rih an nih laiin an document duh angte pe thei turin thawktu thenkhat chu Pisa an kai phalsak a nih thu a sawi bawk. Tarlan tawh angin MPSC-a hna lak chungchang chhuina tur hian kar hmasa khan Order chhuah niin ni 7 chhunga Report thehlut tura tih a ni.

Mizoram Lok Sabha Inthlanpui a Vote tla te chu June 4, 2024 khian chhiar tura ruahman a ni a, District hrang hrangah a vaiin Counting Centre 13 siam a ni dawn a, Counting Hall 40 siamin Assembly Bial tin tan pakhat zel-ah Vote tla te hi chhiar tura ruahman a ni.

Aizawl-a Maubawk Branch YMA chuan Inrinni khan Tlawng lui-ah tui hleuh, inpil rei siak leh tui chhunga thil zawn-ah intihsiakna an nei a, intihsiakna neih a nih hma hian Maubawk Branch YMA President Vanlalchhuanga chuan Tlawng luiah hian kumtin tuitla zawn ngai an awm thin tih sawiin, “Hei hi duh vang reng pawh ni lovin, vanduai thil a ni a, tui tlahmuh mai an nih loh hian a hnaivai leh neitu chan changa inngai ber Veng te kan chetchhuah a ngai thin a. Chumi atan chuan thalaite kan in ruahmana, huaisen taka kan mihring puite kan chhanchhuah hi kan tih makmawh a ni,” tiin intihsiakna an buatsaih chhan a sawi a. “Kan Veng tui thiamte pawh an upa ve zel a, thang-tharten an aite pawh kan awh chhoh ve zel a ngai a, chutiang tur chuan thalai zawkte kan inbuatsaih ve zel a ngai a ni,” a ti bawk.

Mizoram Addl. CEO Dr. H. Lianzela chuan Lok Sabha inthlanpui neih zawh takah Polling Party ten tluang takin an tih tur an tih theih thu sawiin, dan leh thupek kenkawh kawngah engmah harsatna report an dawn loh thu a sawi a; hriat chinah khawl felloh vanga vote thlak harsatna thleng a awmloh thu leh EVM leh VVPAT chiang lo avanga vote khaihlak hmun thenkhata awm chu hun reilote chhungin khawl thara thlak nghal a nih thu a sawi a, Vote tla erawh an beisei aia a hniam thu a sawi bawk. Addl. CEO chuan, Constable Lalrinpuia, IR Battalion Khawzawl District-a Kawlkulh khua chu a duty-na hmun, 24-14Vangchhia Polling Station-a lungphu chawla boral chu Election Department chuan pawi a tih thu a sawi bawk.

District Legal Services Authority, Aizawl bultumin Central Jail a tang mek hmeichhia te tan Skill Training buatsaih a ni.

Mizoram Lok Sabha Inthlanpui-a Vote thlak chu tluang taka zawhfel a ni ta a, Mizoram pumah Vote za zela 56.87 tlain hetah hian Postal Ballot leh ETPBS te chhiar tel a ni lo a, Vote nei zat atanga chhutin Mizoram District hrang hrang zingah Aizawl District-ah Vote tlak chhiatna ber District a ni.

Zokhawthar a India leh Myanmar inkalpawhna lei chu Zirtawpni tlai khan Assam Rifles ten an khar a nih hnuah April 30 thleng hawn zui tum a ni.

Kumin January atanga March thla tawp thleng khan Mizoram-ah In kang 16 chhinchhiah ni tawhin kangmei vangin mi pakhatin nunna a chân tawh bawk.

Central YMA chuan sahimna zawnga rawn lut Zofa unaute chu Mizorama an awm chhûngin ram dan leh khawtlang inrelbawlna zawm tur turin an hriattir.

 

 

 

Lok Sabha Inthlanpui chu Serchhip District-ah pawh nimin khan tluang taka neih a ni.

Samagra Shiksha Serchhip District-a thawktute chuan kumin-a Zirlai naupangte hnena zirlaibu a thlawna an sem tur zinga a tam zawk chu an sem tawh thu sawiin, tunah hian sem tur engemaw zat an la kawl thu leh lehkhabu la rawn thleng lo pahnih ala awm thu an sawi.

Tunhnaiah Mizoram District thenkhat ah Vawk natna, African Swine Fever (ASF) hmuh leh niin hmun thenkhat chu ASF lenna hmun ah puan a ni leh tawh a, Serchhip DVO Dr. H. Vanlalrawna chuan tun dinhmunah Serchhip District chu ASF lakah hian a la him rih nia an hriat thu sawiin, mipuite chu Vawk leh vawksa tanga thil siam chi hrang hrang lakluh kawngah fimkhur se a duh thu a sawi a. Serchhip District-a Vawk lakluh chungchang ah hian khapna Order pawh tihchhuah leh thuai tum a nih thu a sawi bawk.

Mizoram Lok Sabha Intlanpui 2024 chu nimin khan tluang taka neih niin thil duhawmlo liantham thleng a awm hriat a ni lo a. Kumin-a Inthlanpui ah hian Vote tla tha lutuk lovin nimin tlai dar 5:00-a Vote thlak hun khar a nih thlengin za zela 56.68 vel tlain hei ai hian Vote tla zat hi tha hret tura ngaih a ni.

Keifang Police Veng-a cheng Lalngaih-awmi (18) d/o Laltlanzova chu nimin khan Tui-vawl lui-ah chesualin tui-ah a tla a, nizan khan a ruang hi hmuh a ni. Thudawn danin Lalngaih-awmi hi a thiante nen nimin khan Phullen kai Tuivawl-ah kalin chawhnu lam khan Mawnghlim li an tih chhakah chesualin tui-ah a tla a, tuitla hi zawn nghal niin nizan dar 7:30 vel khan a chetsualna atanga hla vak lo li-ah a ruang hi hmuh a ni.

Lok Sabha Inthlanpui neih Champhai District chhung Vangchhia Polling Station-a Duty Lalrinpuia (28), Kawlkulh Workshop Veng, tuna 2nd IR Bn. a Constable chu nimin zing khan Polling Station hmuna an riahna ah lungphu chawlin a boral a, nimin vek khan a ruang hi an khua ah lak a ni. Lalrinpuia ruang hi Champhai atangin DC leh SP hova thlahin, he thil thleng hi CEO hnenah hriattir a nih thu leh ralna pawh a rang thei anga an dawn theih nan hmalak a nih tur thu DC huan a sawi.

MNF President leh Chief Minister hlui Zo-ramthanga chuan inthlan boruak thlirin an party Candidate K. Vanlalvena chu a tlin ngei a beisei thu nimin-a thuthar thehdarhtu ten an kawmna ah a sawi a, an party Candidate K. Vanlalvena chu Rajya Sabha MP a nih chhunga a hnathawh chu mipuiin an hria tih sawiin, Mizoram tana nasa taka hna a thawh avangin a tlin ngei a beisei tih a sawi a ni. MPCC President Lal Thanzara pawhin kumin MP inthlan chu an Party inlungrual lai tak a ni tih sawiin, Party President a nihna anga inthlan a hmachhawn hmasak berah beiseina sang tak a nei tih a sawi bawk.

Nimin-a Mizoram Lok Sabha Inthlanpui neih ah Chief Minister Lalduhoma chuan Chawlhhmun Veng Polling Station-ah Vote thlakin hemi hnua thuthar thehdarhtu ten an kawmna ah ZPM Candidate Richard Vanlalhmangaiha chu a mimal thatna piah lamah a kaihhruai ZPM sawrkar kut ke tur anih avangin ZPM Sawrkar thar tawiawm duhtu ten an vote a beisei thu leh a tlin ngei a beisei thu a sawi a. Tunhnaia mi thenkhat ten Richard Vanlalhmangaiha an beihna chuan MP inthlanah nghawng lian tham a neih a rinloh thu sawiin, an vawrhchhuah hun chu inthlan ala hlat deuh avangin an insawifiah hman thu leh mipui vote ah nghawng a neih a rin loh thu a sawi bawk.

Mizoram Lok Sabha Inthlanpui nimin-a neih ah Governor Dr. Hari Babu Kambhampati chuan Aizawl South-I Assembly Constituency-a Polling Booth 2, Govt. Primary School, Venghlui-ah vote a thlak a, nikum-a MLA Inthlanpui ah khan Vote a lo thlak tawh bawk a ni. Vote a thlak hnua thuthar thehdarhtu ten an kawmna ah Governor chuan Vote nei thar te leh kum naupang te ram hruaitu thlannah hian phur taka tela, an duh zawng, State aiawh a Parliament a thu tur uluk taka thlang tura sawmin, MLA inthlan ang tho a MP inthlan ngai pawimawh turin a chah bawk.

Lunglei leh Tlabung inkar National Highway 302 kaihhnawiha pawl pahnih te chuan niminpiah khan NHIDCL General Manager, Shiv Gulam Dwivedy chu Lunglei-a a Pisa-ah hmuin an ngaih pawimawh hrang hrang an thlen.

Mizoram-ah Lok Sabha Inthlanpui vawi 13 neih tawh ah Congress party-in Lok Sabha MP an nei ngun ber a; State sawrkara Ruling Party vawi 11 an tling tawh a ni.

Mizoram Lok Sabha Inthlanpui neih tura Vote thlak turin inbuatsaihna peihfel a ni ta a, nimin khan Polling party zawng zawng ten an Duty-na tur hmun pan kimin tukin dar 7:00 atang hian Polling Station hrang hrangah Vote thlak a ni anga, Vote thlak hun hi Vawiin tlai dar 5:00 thleng hawn a ni ang.

Mizoram Lok Sabha Inthlanpui neih turah Vawiin hian Vote thlak a ni dawn a, Vote nei ten Vote an thlak theuh theihna turin sawrkar chuan Vawiin hi sawrkar Pisa chawlh ah a puang a, hei mai bakah Sawrkar hnathawk lo te tan pawh hlawh kiam chuang lova chawlhni, ‘Paid Holiday’ atan a puang bawk a ni. Vawiin sawrkar Pisa chawlh a puan a nih avang hian zirna In leh sawrkar Pisa hrang hrangte chu khar a ni ang.

Govt. JM H/S Serchhip-a Eco Club te chuan nimin khan Vantlang tana luanchhuahna leh thil tha tihna hun hmangin Serchhip Hmar Veng-a Unity Orphanage Home leh New Serchhip-a Zoar Deprived Children Home te chu an tlawh a, heng Home-a awm naupangte chu an thawm-hnaw te an suk sak bakah an hmunhma te an tihfai sak bawk a ni. Hei bakah hian Eco Club te hian Serchhip Bazar leh a chhehvel-a bawlhhlawh pawh an chharfai nghal bawk a ni.

THE RIGHT OF CHILDREN TO FREE AND COMPULSORY EDUCATION ACT 2009(RTE Act, 2009) (Dân kan pawisak loh vanga buaina hian kan zirna nasa takin a ti hniam zel)

Governor Hari Babu Kambhampati chuan Vawiin-a Lok Sabha Member thlanna neih turah Vote thlak turah Vote nei zawng zawngte a sawm a, Democracy kutpui hlu takah hian mitinin an chanvo, Vote an thlak ngei a duhsak tih sawiin, thalaite a bikin Vote nei thar, an Vote thlak vawi khatna turte chuan kim taka thawkchhuak tura sawmin Vote tla a that ngei a beisei tih a sawi bawk.

Kolasib Dsitrict chhung Buhchangphai khua a cheng Lalthansanga (45) chu nimin chawhnu dar 2:00 vel khan a thianpa Lalngaihawma (52) chuan Chempui in a nghawng-ah a zai a, Kolasib Damdawi In panpui a nih laiin a boral. Thudawnna in a tarlan danin Lalthansanga leh Lalngaihawma te hi Bru Hnam ve ve niin nimin khan nileng in an inkawm a, Zu te an in dun nia hriat niin chawhnu lamah an inhnial a, In neitu Lalngaihawma hian a thianpa hi chempui in a nghawng-ah a zai ta mai niin a tarlang a ni. Bilkhawthlir Police te chuan tualthattu a puh Lalngaihawma hi nimin tlai khan an man nghal a, Lalthansanga ruang hi Vawiin ah Postmortem tur a ni ang.

Kolasib District chhunga Meidum khua ah niminpiah tlai-a thli leh ruah thawk avangin chenna In 6 chu a chhe leh a, hemi hma Thawhtanni khan Meidum khua ah hian thli tleh avangin chenna In 7 lai a lo chhe tawh bawk a ni. Niminpiah tlai-a In chhia 6 zinga pathum chu thli hian an In chung a hlip a, pakhat chu In bula thing in a varanda a vawchhia a, a dang chu thli in In bang a tihchhiat te an ni a, nimin khan khawtlang huap hnatlang neiin In chhia siamthat leh sak that hna an thawk a ni. Heng In te bakah hian Meidum Vengthar-a PHE Supply Tanky chung rangva pawh thli tleh avang hian a chhe bawk a, heng chhiatna thleng ah hian mihring thi leh hliam an awm lo thung a ni. Heng bakah hian thli tleh avang hian Thingthelh leh Bilkhawthlir khua ah te pawh In chhia a awm tih kan thudawnna chuan a sawi bawk.

Chiefl Electoral Officer (CEO) Mizoram Office-a Addl. CEO Dr. H. Lianzela chuan Mizoram Lok Sabha Inthlanpui neih turah Model Code of Conduct (MCC) bawhchhia an la awm lo tih nimin-a thuthar thehdarhtu ten an kawmna ah a sawi a, Vawiin-a Vote thlak turah pawh tha taka MCC zawm turin Political Party te chu a sawm bawk a ni. Addl. CEO chuan Inthlanpui lo awm tur atan inpuahchahna peihfel a ni tawh tih sawiin, mipui ten Vote an thlak theihna tur chawlh pek chu dik taka zawm nise a duh thu a sawi bawk.

Mizoram Legislative Assembly Speaker in MLA a nihna atanga ban a nih loh chhan insawi-fiah tura a hriattir angin Tuichawng bialtu MLA Rashik Mohan Chakma chuan tun thla ni 15-ah khan Assembly Speaker hnenah insawifiahna a thehlut a, RM Chakma hi Chakma Autonomous District Council (CADC)-ah MDC nilai niin CEM hna a chelh mek a, nikum-a MLA inthlanpui-ah khan MLA atan thlantlin niin tunah hian CEM hna a chelh bakah MLA a ni mek a, hei vang hian Complaint a dawn angin Speaker chuan April 15, 2024 hmaa insawifiah turin a ti a ni. Insawifiahna chungchang ah hian Speaker chuan, “Kan Dan hre mi te kan la rawn anga, a sensitive a, thil tih vut vut theih a ni lo,” a ti a ni.

Election Department chuan Vawiin-a Lok Sabha Inthlanpui neih turah Vote nei zawng zawng te chu Vote thlak theuh turin an sawm a, nimin a thuchuah an siamah Mizoram-ah hian kum 1998 MP Inthlanpui atang khan MP Inthlanpui-ah Vote zaa 70 (70%) aia tam a la tla lo tih tarlangin, “MP Inthlanpui 2019-ah khan 63.13% chauh a tla a. Chutih laiin National average chu 67.1% a ni thung a ni,” an ti a. Kum 2024-ah hian India rama Vote tlak ttatna ber State zinga kan tel ve ngei theih nan mahni hna tul kalsana phur taka Vote thlak theuh turin vote nei zawng zawngte Election Department chuan a ngen a ni.

India ram Lok Sabha Inthlanpui vawi 18-na chu Vawiin hian neih tan a ni dawn a, Chief Election Commissioner Rajiv Kumar chuan Vote nei te chu Vote thlak theuh turin a sawm a ni.

Mizo Students’ Union (MSU) General Hqrs. chuan Mizoram State Commission for Women Chairperson atana ruat chu danin kum bithliah a siam anga tlin tawh lo nia sawiin, he Appointment Notification hi a rang thei ang bera sut leh thuai turin sawrkar an ngen.

Naktuk April 19, 2024-a Mizoram Lok Sabha Inthlanpui neih tur atana Serchhip District-a inbuatsaihna chu peihfel thawkhat a ni ta a, Vawiin hian Polling Party te chuan an Duty-na tur hmun panin naktuk zing dar 7:00 atangin mipui ten Vote an thlak tan dawn a ni.

Khaw awmdan hrilhlawktu ten Mizoram-ah ruahsur, thli leh Tek tla thleng thei nia an sawi avangin Serchhip District mipuite fimkhur tura chah an ni.

Power & Electricity Department in thuchhuah siama April 18, 2024-a 132kV Sub-Station, Serchhip Bukpui-a Maintenance Shutdown lak an tum thu an lo puanzar tawh chu Lok Sabha inthlanpui 2024 inbuatsaihna a khaihlak loh nan thulh a nih thu Sr.EE, Serchhip Power Division chuan mipuite a hriattir.

Nimin khan Advocate General of Mizoram Biswajit Deb chuan Mizoram Governor Dr. Hari Babu Kambhampati chu Raj Bhavan-ah hmuin an inkawm a, he hunah hian India ram Danpui hnuaia Article 191 leh 192 kaihhnawih thil pawimawh tak takte sawidunin an ngaihdante an inhrilh tawn a, heng Article hnuaiah hian Dan hnuaia MLA te ban theihna chungchang ziahlan a ni. Hei bakah hian Inthlan kaihhnawih thil pawimawh dangte an sawidun bawk a ni.

Mizoram Lok Sabha Inthlanpui neih tur atana kum upa, kum 85 chunglam leh Vohbik mahni In lama Vote thlak duh tan Home Voting kalpui chu District hrang hrangah zawhfel a ni tawh a, Home Voting hi tun thla ni 4 atanga 15 chhung khan kalpui niin Mobile Polling Team ten an chenna Ina-h kalchilhin Vote hi an thlak tir a, Kum 85 chunglam mi 1792 leh PwD Voters mi 317 ten Vote hi thlakin heng te hi Vote chhiar ni-ah chhiar tur a ni ang.

Kolkata Ballygunge-a Mizoram House leinaa inhnamhnawih anga Social Media-a puh a nih avanga Ramthansiama S/o Zoramthanga’n kumin January ni 18-a HT. Lalmawizuala, Judicial Magistrate, Aizawl District Court-a Criminal Complaint a thehluh chu Officer-in-Charge, Cyber Crime Police Station Aizawl hnenah chhui chiang tura a tih angin chhui zawh a ni tawh a, hemi chungchanga mawhphurtu nia hriat Zosang-zuala (Sena Zote), Phullen chu damlohna avanga Court-ah a la inlan theih loh avangin Court thu-remna nghah mek a la ni.

Naktuk-a Mizoram Lok Sabha Inthlanpui neih tura hmun hla zuala Duty tur Polling Party te chuan nimin khan an Duty-na tur hmun an pan tan a, Polling Party nawlpui te chuan Vawiin hian an Duty-na tur hmun an pan dawn a ni.

Mizo Academy of Letters (MAL) chuan kum 2023 chhunga Mizo tawng-a chhuak lehkhabu tha ber ‘Book of the Year’ atan ‘Pangparhnima’ tih Ahmangaihi Khiangte ziah chu an thlang a, MAL Foundation Day-ah Book of the Year lawmman hi hlan a ni ang. MAL hian kumtin in Mizo tawng-a lehkhabu chhuak atangin Book of the Year hi an thlang thin a, kum khat-a lehkhabu chhuak atangin Top 20 thlang hmasa in hemi atang hian an thlifim chho zel a ni.

Miss Mizoram 2024 thlanna chu kalpui mek zel niin ‘Miss Mizoram 2024’ atana thlan chuan lawmman ah Rs 2,00,000 bakah Vespa Scooter a dawng dawn.

Mizoram Lok Sabha Inthlanpui neih turah Vote nei ten kim taka Vote an thlak theihna turin ruahmanna siam a ni.

Mizoram Lok Sabha Inthlanpui neih tur atana Campaign theih hun chu nimin tlai dar 5:00 khan a tawp ta a, nimin tlai-a Campaign theih hun a tawp dawn thleng khan Political party leh Candidate te chuan ngawrh takin campaign an nei a ni.

Tunkar Zirtawpni, April 19, 2024-a Mizoram Lok Sabha Inthlanpui neih tur atana Campaign theih hun chu Vawiin, April 17, 2024 tlai dar 4:00 hian a tawp dawn ta a, hemi hun atanga Vote thlak zawhfel hma chuan Television (TV) emaw, Electronic Media/Social Media hmanga inthlan kaihhnawih thil tarlan leh tihchhuahte khap tlat a ni.

Sawrkar kum kalta 2023-2024 chhung khan Mizoram Blood Bank hrang hranga thisen pek zinga za zela 91.22 chu mi tlawmngai ten damlo mamawh apiang ten an hman tura an pek niin Serchhip District Hospital Blood Bank-a thisen pek atanga za zela 95.43 chu a thlawna pek a ni bawk.

Tunkar Zirtawpni-a Mizoram Lok Sabha Inthlanpui neih tur atana Serchhip District-a Polling Official 3rd Randomization chu Vawiin hian neih a ni dawn.

Mizoram Lok Sabha Inthlanpui tun thla ni 19-ah neih a nih dawn tak avangin Serchhip District Magistrate David Lalthantluanga chuan Serchhip District chhungah inthlan boruak muanawm leh thianghlim tak a awm theih nan Section 126 (1) of The Representation of the People Act, 1951- in a tarlan ang leh CrPC 1973 Section 144 in thuneihna a pek hmangin Serchhip District chhungah Vawiin, April 17, 2024 tlai dar 5:00 atanga inthlan zawh hun thlengin mi panga (5) aia tam punkhawm khap a nih thu thuchhuah siamin a tarlang a. He thupek zawm lo te chu IPC Section 188-na hmanga hrem theih an ni ang. He thupek hian chhiatni leh thatni bakah Kohhran inkhawmte, Vote thlak tura kalkhawmte a huam dawn lo thung a ni.

Niminpiah tlai dar 5:30 vel khan Kolasib District chhung Meidum khua-a chenna In 7 te chu thli tleh in a tichhia a, heng zinga pahnih te chu luah zui tlak lohin a chhia a ni. Heng In chhia te seng-hawi leh siamthat hna hi nimin khan hnatlang a thawh niin Kolasib DC hnenah he thil thleng hi hriattir a ni a, Silpoulin 8 pek an nih bakah sawrkar atanga chhawmdawlna awm thei ang ang ngaih-tuah sak an ni bawk ang.

Kolasib District Four Lane Land Owner Association chu sawrkar laka an thilphut leh hemi tih hlawhtlin a nih loh chuan Lok Sabha Inthlan boycott an tum chungchang ah nimin khan thukhawmin Principal Chief Conservator of Forest (PCCF) ten Ministry of Road Transport and Highway-ah April 17, 2024-ah clearance an process ngei dawn tih thu an dawn avangin inthlan boycott an tum chu thulh nise an ti.

Nizan hmasa a Tlawng lui-a Chengkawl khawrh tura kal Lalthawmmawia (42), Tanhril tui-ah tlahlumin nimin khan vuiliam a ni. Thudawn danin Lalthawmmawia hi a nau te nen Chengkawl khawrh tur hian kalin zan dar 9:00 vela an haw dawnin a kim ve ta lo a, Nghaper lipui thlang deuh ah a Torch light eng hmuin Nghalchawm khaw mi te an pun hnuah a ruang hi an lachhuak thei a ni.

Lok Sabha inthlanpui lo awm tur atana Candidate te sum hman dan enfiah tum thumna, 3rd Inspection of Registers chu nimin khan Aizawl DC Conference Hall-ah  Expenditure Observer Arvind Sharma leh Anita Rinesh-i hovin neih a ni a, he hunah hian  Expenditure Agent te chu sum hmanna Register hrang hrang - Day to Day te, Accounts, Cash Register, Bank Register leh Bank Statement leh Voucher zawng zawng te chu Assistant Expenditure Observer leh Accounting Team ten an lo enfiahna atana Candidate te sum sen an lo chhinchhiahna, Shadow Observation Registers leh Folder of Evidence te nen en mil a ni a, Expenditure Agent te, Assistant Expenditure Observer leh Accounting Team te bakah Expenditure Monitoring Nodal Officer leh Assistant Nodal te an tel bawk a ni.

Mizoram Lok Sabha Inthlanpui neih tur atan Vawiin hian hmun hla zuala Duty tur Polling Party te chu an chhuak tan dawn ta a, Polling Party tam ber te chuan naktuk-ah an Duty-na tur hmun an pan dawn a ni. Lawngtlai District chhunga Polling Station 181 zinga Lawngtlai atanga hla zual Polling Station 116-a duty tur Polling Party-te chuan tukin hian an Duty-na tur hmun an pan dawn a, Lunglei District chhunga Polling Station hla zual 13-a Duty tur Polling Party te pawhin tukin hian Lunglei chhuahsanin Mamit District chhunga hmun hla zuala Duty tur Polling party te pawhin Vawiin hian Mamit an chhuahsan dawn bawk a ni.

ZPM Party chuan Zoram mipuite chu uar taka Vote thlak tur leh ZPM Candidate lo Vote turin an sawm.

All Mizoram Car Rental Association (AMCRA) chuan an thil nawr chungchangah thil hriatsual a awm tih sawiin, Adviser to Chief Minister TBC. Lalvenchhunga leh SCERT Deputy Director Florence Lalrinpuii bakah ZPM lakah ngaihdam an dil.

MNF Party chuan nimin khan thuchhuah siamin hun hmasa lamah khan Kuhva tawlh chungchangah ZPM chuan sawrkar hmasa kha nasa takin an dem thin tih tarlangin, mipuiin an kuta thuneihna an pek tak hnu hian Kuhva tawlh hian rem lam aiin pun lam a pan zawk zel emaw ni tih turin man thawm hriat tur a tam em em tih an tarlang a. Sawrkar rawih Police mai nilo, Civil mi thahnem ngaite pawhin an man ta zel mai nia tarlangin, “Civil leh civil inkara hetiang thil a thleng chho ta zel hian sawrkar inthlahdah zia a lantir a. Man an tam rual hian man lohva mit siai khum hi engemawzat a awm tel reng ang tih hi thil rinhlelhawm em em a ni,” an ti bawk.

Mizoram sawrkar-a Excise & Narcotics Department chuan sawrkar kum kalta, April 1, 2023 atang March 31, 2024 inkar chhung khan Zu leh kaihhnawih thildang hrang hrang atangin Chhiah Rs. 2,55,55,304/- zet an hmu.

Mizo Zirlai Pawl (MZP) chuan Mizoram Public Service Commission (MPSC) Chairman ban phut nana niminpiah atanga MPSC-a thawktute Pisa kai tur an dan chu nimin tlai dar 2:00 khan an titawp ta a, MPSC hnuaia hna lak danah thil fello nia sawi chungchang hi chhui turin sawrkar chuan M. Lalmanzuaia (IAS Retd) chu a ruat bawk a ni.

Aizawl SP Rahoo Alwal chuan tunhnaia Aizawl hmun thenkhata mi thil ruk ching mi pahnih an man thu a sawi.

Central YLA Kumpuan Committee chuan Myanmar a Oil leh bungrua thawnlut thinte chu tawpsan turin an ngen.

 

Excise and Narcotics Department hmalakna in nimin khan Serchhip-ah Ruihhlo dona kawnga nasa zawka hmalak dan tur leh kawng tha zawk a awm theihna tura hmalak dan tur sawihona chu Kohhran hrang hranga thalai pawl te tan buatsaih a ni.

Lok Sabha Inthlanpui neih tura 1-Mizoram (ST) Parliamentary Constituency viltu Police Observer K. Satyanarayana IPS chuan nimin khan Serchhip rawn tlawhin Inthlanpui neih tur atana mawhphurhna hrang hrang chelhtute a kawm.

Serchhip District chhunga kum upa leh Vohbik te tana mahni In lama Vote thlak chu zawhfel niin Vote thlak thei 184 zingah mi 177 ten Vote an thlak a ni.

Lok Sabha inthlanpui neih tura Serchhip District chhunga Vote thlakna khawl hman tur thlanchhuah a nih hnuah Inthlan ni-a a chhia awm palh theih thlakna tura hman tur thlanna, Supplementary Randomization chu nimin khan Serchhip DC Office-a NIC Room-ah neih a ni a, he hunah hian Computer Software hmangin Ballot Unit 10, Control Unit 27 leh VVPAT 13 thlanchhuah niin nimin vek khan EVM Engineer ten hman theih turin an siam nghal a ni.

Tunkar Ningani, April 18, 2024 zing dar 9:00 atanga tlai dar 4:00 chhung hian 132kV Sub-Station, Serchhip Bukpui-ah Maintenance Shutdown lak a ni dawn a. Hemi hun chhung hian Serchhip Bukpui Sub-Station in a chawm Khua leh Veng hrang hrang ten Power Supply an hmu thei dawn lo a, hei vang hian Sr. EE P&E, Serchhip Power Division chuan mipuite hriat-thiamna a ngen a ni.

Tuichawng Group YMA te chuan Central YMA atanga Bangladesh raltlante tanpuina an dawn Rs. 50,000/- hmangin nimin khan an huamchhunga raltlan te awmna khaw hrang hrangah Buhfai an sem a, Tuichawng Group YMA hruaitute chuan raltlan tanpuina hi tum hniha pek tumin hun remchang hmasa berah hlan leh an tum thu an sawi a ni. Tuichawng Group YMA huam-chhungah hian tun dinhmunah Bangladesh raltlan mi 900 vel an awm mek a ni.

Mizo Academy of Letters (MAL) chuan kum 2023 chhunga Mizo tawng lehkhabu tha ber thlanna an kalpui leh mek a, kum danga an thlan dan angin March thla chawhma lamah khan nikum chhunga lehkhabu chhuak te atangin a tha zual 20 thlangchhuakin March thla chawhnu lamah lehkhabu 20 atang hian lehkhabu 10 an thlang leh a, chuta tang chuan tunah lehkhabu tha zual pathum an thlang leh tawh a, heng te hi ‘Hniak Hlu’ (Ziaktu Zaii Khiangte); ‘Pangparhnima’ (Ziaktu Ahmangaihi Khiangte) leh ‘Raltiang Rimawi’ (Ziaktu Lalhruaitluanga Chawngte) te an ni a. Heng atang hian Book of the Year thlan a ni ang.

Mizoram Police Subordinate Officers’ Association (MPSOA) hruaitu chuan tunhnai khan Chief Minister Lalduhoma hmuin District hrang hranga Subordinate Police indaihlohna chungchang thlenin Post ruak 4356 chu hnawhkhat rang turin an ngen a. Anti-Corruption Bureau (ACB) a Deputation posts an neih ve chhun luahkhah loha awm thin chu pawi an tih thu pawh thlenin, State chhunga Corruption dona kawnga hnu-chhuitu ber Agency- ACB chu thuam chak turin an ngen bawk a. Subordinate Police-te promotion hun rei tak tak a tangkhang thin chung-chang pawh an thlen nghal bawk a. Chief Minister chuan sawrkar sum dinhmun hmasawn dan azirin thawktu indaihlohna chu an ngaihtuah tur thu a lo hrilh a ni.

Mizoram sawrkar in tum khata khawphetha leina atana sum a pekchhuah tam ber ni turin tunhnai khan Finance Department chuan heng vbc. 81.69 chu a pechhuak.

ZPM Lok Sabha MP Candidate Richard Vanlalhmangaiha chuan sum tih chingpen chungchanga amah puh hmingchhetute chhui turin Aizawl District Chief Judicial Magistrate hnenah Criminal Complaint-a thehlut.

Tun thla ni 19-a Mizoram Lok Sabha Inthlanpui neih tur atan Candidate hrang hrangte chuan ngawrh takin Campaign an nei chho mek zel.

Mizoram Lok Sabha Inthlanpui neih turah mipui ten tluang taka Vote an thlak theih nan Mizoram Police ten theihtawp chhuaha inbuatsaihna an kalpui chu Mizoram DGP Anil Shukla chuan a sawi.

Mizo Zirlai Pawl (MZP) te chuan nimin atang khan Mizoram Public Service Commission (MPSC) Office-a hnathawk te Pisa kai tur an dang.

Tunkar Zirtawpni, April 19, 2024-a Mizoram Lok Sabha Inthlanpui neih tur atan tluang takin inbuatsaihna chu tluang taka kalpui mek zel a ni a, tun tum Inthlanpui-ah hian Polling Station 1276 awmin Venhimna uluk lehzuala kalpui ngai Polling Station 14 a awmin heng te hi ramri hnaih a awm khaw hrang hrang a mi te an ni tlangpui a ni.

Lok Sabha Inthlanpui neih turah Vote tla a that theihna turin Inrinni zing khan Serchhip Bazar ah 'Photo Exhibition & Street Play' neih a ni.

Inter-District Boxing Championship 2024 neih turah Serchhip District Boxing Association chuan Boxer 45 a tir dawn a, Vawiin atang hian Camp an nei tan ang. 19th Inter District Boxing Championship 2024 hi tun thla ni 23-26 chhung khian Aizawl Ramhlun Boxing Hall-ah neih tura ruahman a ni a, kar kalta Ningani khan Serchhip District Boxing Association chuan Serchhip Boxing Hall-ah selection neiin he Championship-a tel tur hian Boxer 45 an thlang a, Coach pakhat in a hruai dawn a ni.