Ramchhung buaina chinfel theih loh avanga ram thenawm Myanmar mawhpuh-ah sawrkar puh
AICC General Secretary leh Union Cabinet Minister hlui Jairam Ramesh chuan Prime Minister Narendra Modi kaihhruai sawrkarin mahni ramchhunga buaina a chinfel theihloh avangin ram thenawm Myanmar a mawhpuh niin a sawi a, BJP Sawrkarna hnuaia kum 2018-a kalpui tan Free Movement Regime chu tihtawp a ni dawn tih a sawi bawk.
Nimin-a Hotel Regency Aizawl-a thuthar thehdarhtute a kawmna ah AICC General Secretary Jairam Ramesh chuan BJP sawrkar in kum 2018 atanga a kalpui Free Movement Regime chu tunah tihtawp an tum leh tih sawiin, Modi sawrkar chuan mahni ramchhung buaina a chinfel theihloh laiin ramdang Myanmar demin buaina awm chhanah an puh niin a sawi a, zalen taka inkalpawh theihna tih bo tumin hma an lak thu leh mahni ramchhunga buaina chu ramdangah a beng per daih niin a sawi a. Modi leh a kaihhruai sawrkar chuan Manipur-a Meitei, Kuki leh Naga te bumin na takin a indo tir mek nia sawiin, Prime Minister chuan an buaina a ngaihsak loh thu leh thla 11 chhung Manipur Chief Minister leh an State hotute a be pawp lo tih a sawi a, Parliament-ah reilote a sawi ve chauh thu leh heng hi RSS thil tum lian tak niin a sawi bawk.
AICC General Secretary chuan BJP in India mipui thenhran a tum laiin Congress chuan hnam tin te inlungrual taka huikhawm an tum nia sawiin, kumin Lok Sabha inthlan lo awm turah India zalenna humhim anih theih nan BJP paih-thlak a ngaih thu leh India Danpui (Constitution) humhim chu kumin inthlanah a pawimawh takzet thu a sawi a, kumin inthlan chu vote hmu tura campaign ngawt lo in India danpui Democracy hum-him turin theihtawp chhuah a ngai tih a sawi a ni.
Jairam Ramesh Congress Manifesto-ah ngaih pawimawh 5 an nei dawn tih sawiin, thalaite tana sawrkar hna nuai 30 siam leh College Degree leh Diploma nei te stipend pek an tum tih a sawi a, Loneitute Minimum Support Price pek leh loan thaibo sak bakah GST chawi tir loh an tum thu leh hmeichhe dinhmun chawikan bakah Health Care nuai 25 thleng an bill theihna tur siam te a tel thu a sawi bawk.
Comments
Post a Comment