Lok Sabha Inthlan-ah Vote nei ten Vote an thlak theuh theihna turin ruahmanna siam a ni

Mizoram Lok Sabha Inthlanpui neih turah Vote nei ten kim taka Vote an thlak theihna turin ruahmanna siam a ni.

Hemi chungchanga sawrkar thuchhuah in a tarlan danin Mizoram Lok Sabha Inthlanpui neih turah hian April ni 19, 2024 (Zirtawpni) zing dar 7:00 atanga tlai dar 5:00 thleng hian vote thlak theih a ni dawn a, he ni hi Sawrkar chuan Public Holiday-ah a puan mai bakah Sawrkar hnathawk lo te tan pawh hlawh kiam chuang lova chawlhni ‘Paid Holiday’ atan a puang bawk a. Election Department chuan inthlanna huapzo, muanawm, felfai, dik leh langtlang, India ram pum tana entawn tlak siam puiah mipuite a sawm a. Vote nei tawh phawt chu khua leh tui nihna anga mawhphurhnate hlen chhuaka vote thlak theuh turin a chah a. Kum hmasa lam zawnga vote tlate khuma India rama vote tlak thatna ber State kan nih theih nan thahnemngai taka tanrual puiah mipuite a sawm nawn leh a ni.

Naktuk-a Lok Sabha Inthlanpui-a Vote thlak hunah hian vote tlak dan chu darkar 2 dan zelah Pollstar App kaltlanga report zung zung tura ruahman a ni a, inbiakpawh harsatna hmunah erawh MPRO kaltlanga chanchin inhrilhhriat tum niin, District tina Control Room-ah Pollstar Nodal Officer leh Official dang bakah MPRO Team an duty vek dawn a. District tinah Call Centre din niin Mizoram Election Helpline Toll Free no. 18003351950-ah Election vuakvet laia complain duh emaw, Election kaihhnawih harsatna neite tan a thlen theih reng a, chhun zan zawmin Official ruat bik ten an vil dawn bawk a ni.

Tun dinmunah inthlan duty tur leh EVM/VVPAT khawl indaih loh na a awm lova, EVM bakah VVPAT (Voter Verifiable Paper Trail) hi Polling Station 1276-ah hman a ni leh dawn a. Tun tum inthlanpuiah hian ECIL siam M3 Model thar ber Ballot Unit 1994, Control Unit 1958 leh VVPAT 2088  hman a ni ang. Vote thlak zawhfel hnua EVM dahna tur Strong Room chu District tinah ruahman fel vek tawh a ni a. Strong Room hi 40 (Assembly Constituency tin tan pakhat theuh) awmin Central Armed Police Forces (CAPF) ten Strong Room kawngkhar bulah chhun zan zawmin an veng anga, Mizoram State Armed Police te pawhin Strong Room awmna building hi chhun zan zawmin an veng dawn bawk a ni. Venhimna lam thawk turin State Police personnel 3553 bakah CAPF Company 12 an duty dawn a. Flying Squad Team (FST) 83 awmin Static Surveillance Team (SST) 81 an awm a, Check Post (Nakas) 52 siam niin heng zinga 12 hi Inter-State Boundary-ah an awm a, a bak zawng hi State chhung hmun hrang hrangah dah a ni. 

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result