Autonomous District Council ten an dinchampha lawm

Mizoram-a Autonomous District Council (ADC) pathum te chuan nimin April 29, 2024 khan an dinchamphaphak pualin hun an hmang.

Kum 1972-a Union Territory dinhmun-a Mizoram hlankai a nih kum khan Mizoram chhimlam a Pawi-Lakher Regional Council huamchhungah District Council pathum- Lai, Mara leh Chakma Autonomous District Council a piang a, kumtin April ni 29 hian an din champhaphak an lawm thin a ni. Kumin hian Lai Autonomous District Council (LADC) chuan an din champhaphak vawi 52-na pual hian Faina hnatlang neiin nimin zing khan LADC hnuaia thawkte chuan Lawngtlai khawpui chhung fang chhuakin kawngpui kam-a bawlhhlawh an chharkhawm a. He hunah hian LADC enkawl lailawktu, Lawngtlai Bawrhsap Cheemala Siva Gopal Reddy pawh a tel a ni.

Mara Autonomous District Council (MADC) pawhin an din champhaphak vawi 52-na pual hian Siaha khawchhung thenfai hnathlang an nei bawk a. Hnatlang tura an insem darh hma hian CEM M. Laikaw chuan MADC Day-ah programme dang siam lova khawpui tan, mipuite leh kan ram tana khawchhung thenfai hnatlang buatsaih a ni chu lawmawm a tih thu a sawi a. Faina kawngah hmasawnna pawimawh tak anih thu a sawi bawk. He hunah hian MADC Executive Secretary K. Vanlalliana chuan hnatlang a telte hnenah lawmthu a sawi bawk.

Chakma Autonomous District Council (CADC)-ah chuan an dinchamphaphak vawi 52-na chuhi CADC Secretariat kawt-ah lawm a ni thung a. He hunah hian CADC Chairman Mohan Chakma chu khuallian niin CADC Secretariat Building thar kawtah Dr. BR. Ambedkar zahna chibai bukin a lim hma ah pangpar a dah a, CADC Secretariat Chawngte-ah lawmna hun an hman chhunzawm a ni.