Serchhip District-ah Tel tharchhuak tam tura Nihawichi chin dan zirhona buatsaih a ni

Krishi Vigyan Kendra (KVK) Serchhip District leh Agricultural Technology Management Agency (ATMA) Serchhip District te tangkawp buatsaihin nimin khan 'Sunflower (Oilseeds) Technology' tih thupui hmangin ‘Joint Field Day’ hman a ni a, Tel tharchhuak tura hmalak a pawimawh dan inzirtirna neih a ni.

'Sunflower (Oilseeds) Technology' tih thupui hmanga East Lungdar Tuipui zau-a Nihawichi chingtute chinna hmuna ‘Joint Field Day’ hi Serchhip District-a KVK, North Vanlaiphai-a SMS (Agronomy) Kenny Zohmingliana chuan kaihruaiin he huna tel East Lungdar Tuipui Zau-a Nihawichi chingtute leh Leng khua atanga Nihawichi ching thar duh mi 20 vel tel te lawmna thu a sawi a. KVK Serchhip District-a Senior Scientist & Head Dr. T. Vanlalngurzauva chuan hriak pai thlai chin uar a pawimawhna leh Department te hmalak tum dan tlangpui sawiin, India ram hian ei barah nasa taka hmasawnin, mahni mamawh tawk aia tam mah Green Revolution avang khan kan tharchhuak thu leh chutih laiin Pulses (Dal, Be etc) ah hun engemaw chen mahni mamawh kan thar loh hnuah tunah chuan Pulses-ah pawh kan intodelh thawkhat tawh nia hriat a nih thu a sawi a. Amaherawh chu Vawiin thlenga ramdang atanga kan mamawh kan la chawkluh te zinga pawimawh tak chu Oil (Tel) lam a nih thu sawiin, “Kan ram sum hlu tam tak hi ram dangah a luangchhuak nasa em em a ni. Chuvang chuan Oil (Tel) lama intodelh hi Central hotute pawhin an ngaih pawimawh em avangin hemi lamah hian tan kan lak tak tak chuan Central atanga sum hailuh hi kan hotute tan a har a rinawm loh a. Chuvang chuan Vawiin-a he program hmangtute hi in pawimawh takzet a ni,” tiin Tel herna pawh hotute duhsakna avangin KVK chuan khawl thar an nei thuai dawn tih a sawi a, tunhmaa Tel herna awm loh avanga harsatna kha tunah chuan sutkian a ni ngei dawn nia a lan thu leh khawl-a her tham thar kan mamawh  thu sawiin, “Mahni Tel her ngei, Tel fir tak in kan choka a luahlum thuai theih na'n mahni zawn theuhah theihtawp i chhuah theuh ang u,” a ti bawk.

He hunah hian ATMA East Lungdar Block-a Block Technology Manager Lalremruata chuan KVK te nena hun an hmang ho thei chu lawmawm a tih thu sawiin, Nihawichi ching thar duh mi engemaw zat an awm nghal chu lawmawm a tih thu a sawi a, tih theih an neih apiangah thawh-hona tha siam an duh thu a sawiin, KVK te hmalakna chu fakawm a tih thu a sawi a. He hun kaihruaitu  KVK-a SMS (Agronomy) Kenny Zohmingliana'n nihawi ching dan tha (Scientific cultivation practiced) tlangpui a sawi a, Nihawichi chin chung-changa zawhna leh chhanna hun hman chhun-zawm a nih bakah Nihawichi chinna hmun te tlawhin a hmunah inhrilhfiah ngai an tih te inhrilh-fiahna hun hman a ni bawk.

KVK Serchhip District hian Agronomy Discipline hnuaiah kum 2016-17 atang khan Nihawichi zirbingna hna a lo kalpui tawh a, Khawchhak lam leh India ram hmun hrang hrang atangin a chi (Variety) tha te lakhawmin Serchhip District leilung leh boruak mil tur leh a chin dan kalphung bakah a enkawl dan leh a hriak sawr thlengin zirchianna an kalpui mek a. Sailam, Zawlpui leh East Lungdar-ah te hlawhtling taka chin ni tawhin, kuthnathawktute ngaihven a hlawh thar hle bawk a, Mizoram sawrkar hnuaia NMEO Scheme-ah sawrkar in zau zawka kuthnathawktute hnen thlen tumin hma ala mek zel bawk a ni.