Mizoram Power man ba vbc. 81.69 pekchhuah a ni

Mizoram sawrkar in tum khata khawphetha leina atana sum a pekchhuah tam ber ni turin tunhnai khan Finance Department chuan heng vbc. 81.69 chu a pechhuak.

Hemi chungchang hi Chief Minister Lalduhoma chuan nimin khan a Instagram kaltlangin a tarlang a, heta a tarlan danin December, 2023 thleng-a Mizoram pawna Central Power Generating Station atang te leh Transmission Company te, Mizoram chhung Tuirial Hydel Project atangte a Kawlphetha lei tawhna man ba la pek loh tlingkhawm leh, February, 2024 thlenga Vankal Solar Park atanga Kawlphetha siam-chhuah lei tawhna man ba la pek loh tlingkhawm, a vaiin Rs. 81,69,49,255/- chu April 12, 2024 (Zirtawpni) khan Mizoram State Finance Department chuan a pechhuak tih a tarlang a. “Hei hi tum khatah Kawlphetha leina atana sum pekchhuah tam ber a la ni a, chu mai bakah Power & Electricity Department in Kawlphetha leina man pek tlakna atan thlatin Aizawl North Treasury Office-ah Cheque an thehluh tangkhang mek te a zavaiin pek tlak vek a ni ta hi thil chhinchhiah tlak tak a ni awm e,” tiin a tarlang a ni.

Lalduhoma chuan kum 2023-2024 ah Kawlphetha lei nana Budget-a sum awm zat chu cheng vbc. 414.00 a nih thu leh hei hian kum kalta 2022-2023 a ba la pek kimloh pek nan hman a ngaih tel avangin kum kallai December, 2023 thlenga Central Generating Station (CGS) te atanga Kawlphetha leina man pek nan a daih tawk chauh tih a tarlang a, January 2024 atanga March 2024 chhunga Mizoram in Kawlphetha kan hmanral tawh leina man chu Kum 2024-2025 Budget atanga pek turin chak taka hmalak chhunzawm mek a nih thu a tarlang bawk a ni.

Hei bakah hian Mizoram chhunga hman tur Kawlphetha leh a kal kawng (Transmission line) hman man te a hun taka pek ngai loh vanga pek tlai man pek belh ziah ngai (hei hi Late Payment Surcharge tih a ni) thin tihbo mai bakah, pek huntiam chhunga pek theih vanga thla tin chawhruala cheng nuai sawmli vel pek ngailo (hei hi Rebate tih a ni) zawk thei turin Mizoram Sawrkar chuan hma a la zel dawn tih a tarlang bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result