Kum kalta chhunga Serchhip Blood Bank-a thisen pek zinga za zela 95.43 chu a thlawna pek a ni

Sawrkar kum kalta 2023-2024 chhung khan Mizoram Blood Bank hrang hranga thisen pek zinga za zela 91.22 chu mi tlawmngai ten damlo mamawh apiang ten an hman tura an pek niin Serchhip District Hospital Blood Bank-a thisen pek atanga za zela 95.43 chu a thlawna pek a ni bawk.
Mizoram State AIDS Control Society (MSACS) hnuaia Blood Transfusion Service Division in, nikum (2023) April 1 leh kumin (2024) March 31 thlenga Mizoram chhunga Blood Bank hrang hranga thisen pek an chhinchhiahna atanga a lan danin hemi hun chhung hian Mizoram-a Blood Bank hrang hrang 11-ah thisen Unit 35,619 pek a ni a, heng zinga Unit 32,493 chu mi tlawmngai ten damlo a mamawh apiang ten an hman theih tura a thlawna an pek, Voluntary Donation a ni a, hei hi thisen pek zawng zawng atanga chhutin za zela 91.22 a tling phak a. Hemi hun chhung hian Blood Donation Camp tum 585 buatsaih niin heng Camp hrang hrangah hiant thisen Unit 21,874 lak a ni a, a bak Unit 10,619 te chu mahni remchan anga Blood Bank-ah kala thisen pe te an ni thung.

Mizoram-a Blood Bank 11 zingah Civil Hospital, Lunglei leh District Hospital Saiha te chu hemi hun chhunga thisen an dawn atanga za zela chhuta a thlawna pek dawng tam ber niin Civil Hospital, Lunglei-ah hian thisen an dawn Unit 3444 atanga za zela 99.48, Unit 3426 chu Voluntary Donation niin District Hospital Saiha hian thisen an dawn Unit 1158 atanga za zela 99.48 bawk, Unit 1152 chu Voluntary Donation a ni bawk a. Christian Hospital Serkawn (97.59%) leh District Hospital, Kolasib (95.73%) ten an dawt bawk a ni.

District Hospital Serchhip Blood Bank chu thisen dawn atanga chhuta a thlawna pek dawng tam-ah 5-na niin sawrkar kum liamta chhung khan thisen Unit 831 dawngin heng zinga Unit 793 chu Voluntary Donation a ni a, hei hi thisen an dawn atanga chhutin za zela 95.43 a tling phak a ni. Hemi hun chhung hian Voluntary Blood Donation Camp tum 31 buatsaih niin heng Camp hrang hrangah hian thisen Unit 723 lakkhawm a ni a, Voluntary Donation dang Unit 70 chu mi tlawmngai te mahni-a Blood Bank-ah kala thisen an pek te a ni thung a, nikum chhung khan Serchhip Blood Bank-ah hian mi tute emaw tan bika thisen pek Unit 38 a awm bawk a ni.

Association for Voluntary Blood Donation (AVBD) Serchhip Branch hruaitute chuan damlo a mamawh apiang ten an hman tura tlawmngai thisen pe thin mi thahnem tak an awm chu lawmawm an tih thu sawiin, tlawmngaia thisen pe thin te chungah lawmthu sawiin, tlawmngai taka pe chhunzawm zel turin pawl hrang hrang leh mimal te an sawm bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result