Lunglei leh Tlabung inkar kawng siam sawipui

Lunglei leh Tlabung inkar National Highway 302 kaihhnawiha pawl pahnih te chuan niminpiah khan NHIDCL General Manager, Shiv Gulam Dwivedy chu Lunglei-a a Pisa-ah hmuin an ngaih pawimawh hrang hrang an thlen.

NH 302 Welfare Committee, Lunglei leh NH302 Ngaihven Pâwl, Tlabung te hian NHIDCL hotu hnenah hian Phairuang Lei chungchanga an duh khawp lohna thlenin, Lungsen leh Chhûmkhum khua ten kawngpui laihna leivung paih dana harsatna an tawh mêk pawh an thlen a, Chhûmkhum khaw lui, Aiawt an chiahna leh an khua in chawhmeh an zawnna ber lui kawng laihna leivungin a tihchhiat thu an thlen bawk a. Lungsen khuate lui humhalh, Sangha man an phal lohna leivûngin a tihchhiat sak nasat thu an thlen bawk a ni.

NHIDCL te hian heng khaw pahnih huamchhungah hian leivung paihna tur, Spoil Bank pathum an dah thu lo sawiin, an Spoil Bank chu ennawn tul an tih thu an lo sawi a. Kawng laia hnathawk ho thli avanga Rângte khuain harsatna tawh chungchang te, NH-302 siam mekah Sub-Grade, Sub-Base leh thildang siam mêkte leh an metal tawh chin te pawh Water Mix Macadam (WMM) a tha tawk lo hle a an hriat thu leh, Box Culvert thenkhat an rin tawk loh thu an sawi a ni.

NHIDCL hotute chuan NH-302 siam nana an hmanraw hman te an Laboratory-a test an duh thu leh thawhhona tha tak neih an duh thu an sawi a. Pawl pahnihte hian niminpiah vek khan NH-302 sial hna endik tura Consultancy Firm rawih, CMEC Consulting Engineers Pvt. Ltd-te chu an inkhuarna hmunah kalchilhin an kawm bawk a. An Team Leader hnenah NH 302 sial hna vil leh endik tura thawktu an indah dan te an zawtfiah a. Remchang hmasa berah hmun thenkhata an hman tur lung te chu an Laboratory-ah ngei endik tha an tih thu an thlen bawk.