Tiau Lei khar hawn lailawk leh rih a ni

Zokhawthar a India leh Myanmar inkalpawhna lei chu Zirtawpni tlai khan Assam Rifles ten an khar a nih hnuah April 30 thleng hawn zui tum a ni.

Assam Rifles hotute chuan thuthar thehdarhtute zawhna chhangin thuneitu sang lam atanga thupek an hmuh anga Lei chu khar an ni tih an sawi a, Zirtawp tlai dar 5:00 vel khan India leh Myanmar inkalpawhna Lei an khar hi hawn leh phutin Khawmawi (Myanmar) leh Zokhawthar mipuite chu Lei bulah hian an pungkhawm a, Lei pin tak hi hawn leh an phut a. Hemi hnu Inrinni chawhnu lam atang khan Zokhawthar leh Khawmawi inkara Lei hi hawn leh niin April ni 30 thleng hawn chhunzawm a ni anga, May ni 1 atanga khar chhunzawm leh a ni ang tih kan thulakna chuan a tarlang bawk a ni.

Zokhawthar VCP Lalmuanpuia chuan Zirtawpni kaltaa Inthlan Vote thlak hun tawp hma khan Zokhawthar khawtlang hruaitute hi Tiau lui kamah koh an ni tih sawiin, India leh Myanmar inkar ramri chu khar a nih thu leh engti kawng  mahin intlawhpawh a theih rih loh a nih avangin Zokhawthar leh Khawmawi khawtlang hruaitute an lungawi lo hle tih a sawi a. Hemi chungchang hi Champhai DC-ah an thlen nghal tih sawiin, Lei pin vang hian nitin eizawnna kawngah harsatna an tawk nghal tih a sawi bawk.

Hetihlai hian Lalnuntluanga (Tluangtea) Hualngoram Art, Culture and Tourism Head Officer chuan thuchhuah siamin ni 19.4.2024 Zirtawpni atangin tiamchin awm lovin Assam Rifle chuan Zokhawthar-a India leh Myanmar inkalpawhna kawng an khar thu leh, Lei (bridge) atang leh a hnuai lui atang pawhin bungrua pawh a kal kaipui theih tawh loh bakah eng lirthei mah kal kai an rem ti lo tih a tarlang a. Buannel leh Rihdil kal tumte tan a kal theih rih loh tih a tarlang bawk.