Serchhip-ah Candidate 4 rawn campaign tawh

Lok Sabha Inthlanpui neih tur atana Campaign chuan a vawrtawp a thleng chho mek a, Candidate mi 6 zinga mi 4 te chuan Serchhip-ah hun an hmang tawh a ni.
Tun thla ni 19-a Mizoram Lok Sabha Inthlanpui neih tur atan hian Campaign theih hun ni 4 vel chiah a awm tawh avangin Candidate leh an party te chuan ngawrh takin Campaign an nei chho mek a. Candidate zinga mi 4 te chuan Serchhip rawn tlawh tawhin mipuite khawngaih Vote an dil hlawm a ni. Candidate zinga Serchhip-a rawn kal tawh zingah MNF Candidate K. Vanlalvena chuan March 28, 2024 Serchhip Bazar-a Street Campaign-ah thu sawiin, an Party Office-a thu a sawi bakah thuthar thehdarhtute a kawm a, he inthlan a chuh chhan leh hmalak a tumna hrang hrangte a sawi a ni.

BJP Candidate Vanlalhmuaka chuan tun thla ni 9 khan Serchhip-ah thuthar thehdarhtute kawmin Lok Sabha Inthlanpui neih tur a chuh chhan leh BJP atanga thlantlin a nih chuan Central Minister nih theihna hun remchang a neih te a sawi a. Independent Candidate Lalhriatrenga Chhangte chuan tun thla ni 11 khan Serchhip-ah thuthar thehdarhtute a kawm a, he Inthlan a chuh chhan leh mipuite tana hmalak a tum dawn te a sawi a. INC Candidate Lalbiakzama chuan tunkar Nilaini khan Serchhip rawn tlawhin Serchhip Bazar-a Vantlang Inkhawm-ah thu a sawi bawk a ni.

Candidate zinga Serchhip la tlawh lo ZPM Candidate Richard Vanlalhmangaiha chuan karleh Thawhlehni khian Serchhip-ah hun rawn hmangin Vantlang Inkhawm te pawh nei tura ruahmanna an siam thu an Party hruaitute chuan an sawi a. MPC Candidate Rita Malsawmi chuan Serchhip-ah hian hun a rawn hmang hman dawn lo nia a lan thu an party hruaitute chuan an sawi bawk.