Insurance document lem siam thu ah mi 7 man

Motor Insurance document lem siam chungchangah Aizawl Police Station-a thawktute chuan tunhnai khan mi 7 an man.

Aizawl Police Station-a thawktute chuan Transport Department atanga thu an dawn bawhzuiin Motor Insurance Document lem siam avangin mi pasarih te hi an man a, an zinga pali chu mipa niin midang pathum chu hmeichhia an ni thung a, Court-a hruai an nih hnuah Court phalna angin Police te hian thu zawhfiah turin an la kawl a ni. Heng mi 7 an man zinga mi 5 te hi tun thla ni 11 leh 12-a man niin midang pahnih hi a hnuah man leh an ni a, midang inhnamhnawih te pawh chhui mek zel niin Document lem siamna atana an hmanraw hman thenkhat te pawh Police chuan an man tel niin a sawi bawk. Heng mi an man te hi Ramngaihsangi (31), Ramthar North, Aizawl; Malsawmzela (28), Ramhlun Venglai, Aizawl; David Lalzarliana (35) Hunthar Veng, Aizawl; Lalngaihsaki (35), Republic Vengthlang, Aizawl; Lalrosiama (32), Upper Republic, Aizawl; Lalremruati Ralte (31), Falkland Veng, Aizawl leh David Lalhmachhuana (37), Ramhlun South, Aizawl te an ni. Motor Insurance Document lem siamtute hian a Original siamna man atanga chhutin za zela 30 (30%) vela hniamte in an siam sak theih bakah an deliver thlap thei a. Lirthei a zirin document lem siam man hi a to bawk a ni.